Shah kem san ngut ha ryngkat ka pistol ba shna ha Russia na Mawsynram

Syllad | The Rising MeghalayaFebruary 10, 2025

Ki pulit ha ka 9 tarik Rymphang ki la ioh ban kem noh ia san ngut ki briew bad ioh kurup ia kawei ka pistol ba la shna ha Russia na ka thain Mawsynram, East Khasi Hills.

Kane ka jingioh kem ka la wan long hadien ba ki pulit na ka Special Cell /SOT ha ryngkat ki pulit ka Mawsynram Police Station ki la pynlong ia ka jingtalasi ha ki bynta jong ka thain Mawsynram.

Ha kane ka jingtalasi ki pulit ki la ioh ban kurup ia kawei ka pistol ba la shna ha Russia ha ryngkat sawtylli ki kuli .22, hynriew tylli ki mobile phone, kawei ka voter ID card, kawei ka Pan Card, kawei ka ID card jong ka National Hynniewtrep People bad kawei ka ID jong ka Ministry of Defence.

Kine ki briew kiba la shah kem ki dei kiba la tip kyrteng kum u Aidonsing Nongsiej (40), Orally Khardewsaw (33), Wanrilang Nongkynrih (33), Mossingstar Nongbri (28) bad u Pynshailang Puwein (30 snem rta).

Ha kane ka jingtalasi ki la kurup noh ruh ia artylli ki kali tourist kiba don ia u nombor ML 05 1319 & ML 05 AA 7184.