Shah kem saw ngut ki nonglute ha Jowai Bypass, kurup pistol bad kuli

Ki pulit jong ka West Jaintia Hills District Police kila pynpra phom iaka kynhun ki nonglute ha surok bah Jowai Bypass haka jingbuddien kaba la neh shitaiew lynter bad ioh kem 4 ngut ki runar ryngkat kawei ka pistol shna hi bad ki kuli kiba ym pat bthei.

Superintendent of Police, Bikram D Marak ula ong ba da ka jingiohkem ia kine ki saw ngut ki runar la ioh kurup iaki tiar ba ki pyndonkam ba kynthup iaka kawei ka wait tukri, pistol shna hi, 6 tylli ki kuli .22 bym pat bthei, 2 mobile phones bad 2 battery of truck.

Ula ong ruh ba kila kurup iaka kawei ka kali maruti car 800 kaba ki pyndonkam haka por ba leh iaka kam lute ha katei ka surok bah.

Halor kane ka jingiohkem ki pulit kila register iaka case katkum ki kyndon jong ka aiñ bad ka jingtohkit kala iaid shakhmat.

Lah ban pynkynmaw ba kane ka jingiohkem ia kine ki saw ngut ka dei naka jingiohkem u wei uba kyrteng u Thehbiang Talang (27) na Barato uba la shah kem naduh 10 tarik une u bnai hadien ba mudue ejhar uwei u nongniah trok ba kyrteng Saiful Islam.

Haka jingujor jong une u nongniah trok ba ki don saw ngut ki briew kiba la lute ia u da kawei ka kali maruti car (WB-02R-4019), kila pynpait iaka iit ka trok haka por ba u dang pynieng iaka trok ha Jowai bypass haka 7 tarik u Risaw

Une u nongniah trok ula ong ba kine ki saw ngut kila shoh la bom ia u bad u nongbud jong u da kaba pyndonkam iaka pistol bad wait bad lute ruh 4,000, mobile phone ar tylli ki battery kali.