Shah kem saw ngut kynthup ki dkhot ka HNYM ba donkti dawa pisa

Syllad | The Rising MeghalayaSeptember 18, 2024

Ki pulit ka East Khasi Hills kila ioh ban kem noh ia saw ngut ki briew kiba donkti ha kaba dawa pisa haduhT.10 lak na uwei u briew uba la leit ban ujor da ka ejahar hapoh Madanrting Police Station.

U Superintendent of Police ka East Khasi Hills, u Bah Sylvester Nongtnger lyngba u kyrwoh u pyntip ba ha ka 24 tarik u Nailar ba la dep ka la don ka jingujor ejahar hapoh Madanrting Police Station ba ha ka 8 tarik Nailar 2024, uwei u briew u bym lah ban ithuh u la phone sha une u nongujor ha ka por kumba 7 baje janmiet bad dawa pisa haduh T.10 lak (shiphew lak).

Hadien kane une u briew bym lah ban ithuh u la phone biang sha une u nongujor bun bunsien ban pynbor ba un siew mardor ia katei ka pisa. Hynrei, une u nongujor um shym la siew satia.

Kumta une u briew ha ryngkat bad arngut kiwei pat ki paralok jong u ki la leit sha ka iingsah jong une u nongujor ha ka 20 tarik Nailar ba la dep ha ka por kumba 7 baje janmiet da ka jingthmu ban dawa pisa.

Hynrei namar une u nongujor um shym la don ha iing ha katei ka por, kumta kine ki briew ki la byrngem byrsit ia ka khun jong u.

Kumta halor kane ka jingjia la rejister kam bymman hapoh Madanrting PS ha kaba na ka liang ki bor pulit ki la ioh ban kem noh ia ki sawngut ki briew kiba donkti ia kiba la tip kyrteng kum u Garnett Gedian Khongwir, 30 snem rta uba dei u dkhot ka Seng HNYM, u Kyrshanbor Lyngdoh, 38 dkhot ka HNYM, u Thounaujam David Singh 41 snem bad u Narendra Kabrambam, 29 snem rta.

Na ka liang ki pulit ki la iaid shakhmat ban pynlong ia ka jingtohkit kaba bniah khnang ban lap ia ka daw tynrai.