Shah kem sawngut ki nongkhaii beain ia ki snieh Kyrbei na Meghalaya ha Assam

Syllad | The Rising MeghalayaAugust 12, 2024

Ka tnad Forest ka Assam ha ka 9 tarik mynta u bnai ki la ioh ban kurup noh ia shibun bah ki snieh Kyrbei na ka jingkhynra hapoh ka Dhaba ha Daranggiri ha Goalpara District ka Assam bad kem noh ia sawngut ki briew kiba donkti.

Kine ki sawngut kiba la shah kem ki dei kiba la tip kyrteng kum u Jindas Momin (49), Benarson Momin (45), Kilen Sangma (35) bad u Cabisto Momin (25). Baroh ki dei na ka shnong kaba hap hapoh  Kharkutta police station, North Garo Hills ka Meghalaya.

Kine ki la shah pynngat hapoh ki kyndon Sections 9, 39, 49(B), 50(1) bad 51 of the Wildlife (Protection) Act, 1972 namar ka jingdonkti ha kaba khaii beain ia ki snieh jong kine ki mrad kiba don ha ka jingiada kaba kyrpang namar ki dei ki jaid mrad kiba la sdang ban duhjait.

Kine ki snieh kyrbei ba la ioh kurup ki don haduh 1 kilo ka jingkhia bad kiba shongdor haduh kumba T.2 lak ha ki iew bein jong ka pyrthei, ong u Dharmendra Das uba dei u Range Officer na Rangjuli Forest, kaba hap hapoh Goalpara Forest Division.

Kane ka jingioh kurup ia kine ki snieh Kyrbei kadei ruh ka sien kaba ar ha ka thain shatei Lammihngi (North East) hadien ba ki pulit ka Mizoram ki la ioh ban kurup haduh 98 kilo ki snieh kyrbei na ka jaka ap pahara ha Vairengte, ka sor rit hapoh Kolasib district ka Mizoram ha ka 6 tarik u Lber mynta u snem.

Lah ban pynkynmaw ba ka jingkhaii beain ia kine ki snieh Kyrbei ka dei kaba la mih bujli ha ka jaka jong ki kam khaii bein ia ki reng Kyndad hapoh North East, kata hadien ba ki bor pulit bad ka tnat forest ha Assam ki la pynjur ka jingpahara ban khanglad ia ki kynhun runar kiba ju pyniap dusmon ia ki Kyndad shireng (one horned rhino) tang ban ioh ia ki reng jong ki.