Shah kem u ehrang barim ka UALA bad arngut ba thmu pynkhie im ia ka Seng lehnoh GNLA

Syllad | The Rising MeghalayaMarch 6, 2024

Ki bor pulit ki la ioh ban kem noh ia u ehrang barim ka kynhun kieng atiar United Achik Liberation Army (UALA) bad ia arngut kiwei pat halor ka jingthmu ban pynkhie im biang ia ka kynhun Seng lehnoh kaba la shah khein beain ka  Garo National Liberation Army (GNLA).

Kine ki laingut kiba la shah kem noh ki dei kiba la tip kyrteng kum u Simsang K Marak (40) na Resubelpara, u T Sangma (40) bad u Suresh Sangma (32 snem rta) kiba dei na Adogre.

Haba kren sha ki lad pathai khubor ha ka 5 tarik Lber, u Superintendent of Police ka North Garo Hills u Bruno A Sangma u la ong ba u Simsang u dei u ehrang ba rim jong ka kynhun kieng atiar UALA.

“U Simsang u dei uba la ioh ia ki jingiarap lyngba ka sorkar bad u dei uba donkti hakhmat eh ha kaba iadei bad kane ka jingthmu. U dei ruh u ba la shah thwet jur ha ki pulit ka Assam. Ka iingbishar ha Assam ka la pynngat ia u hapoh ki kyndon MPWA bad ngin aiti ia u sha ki pulit ka Assam, kata hadien ba la dep ban pynlong ia ka jingtohkit hapoh North Garo Hills,” ong u heh pulit.

La kem noh ia kine ki laingut hadien ka jingujor ejahar hapoh Kharkutta police station ha ka 24 tarik u Rymphang ba la dep. Shwa kane ki la don ruh ki jingthoh hapoh ki social media kiba la mih ha ka 7 tarik u Rymphang ba la dep kiba ong ba ka GNLA ka la khie im biang.

“Na kine ki laingut ngi la ioh ban kurup ia ki mobile phone ia kiba la pyndonkam na ka bynta ki kam pyntriem….Ki la dawa pisa haduh T.20,000 na uwei u lanot uba dei na North Garo Hills,” ong u Sangma.

Da kaba pynpaw ba kin dang don shuh shuh ki ban dang shah kem ha kine ki sngi ki ban wan, u SP u la ong, “Ki don kumba 7-8 ngut ki dkhot ha kane ka kynhun kaba thymmai kumta ngin ym map satia bad ngin behthong ia ki.”

Haba kylli, u Sangma u la ong ba ia kiba bun ki tiar ialeh ba la buhrieh da ka GNLA la ioh ban kurup noh ha Williamnagar ha ka por ba nga dang don ha kane ka jaka.Ia mynta hi ngim shym la ioh kurup tiar ei ei, u la bynrap shuh shuh.