Shah kem u HNLC barim ba lum pisa beain na ka bynta ka seng

Syllad | The Rising MeghalayaSeptember 21, 2024

Ki pulit ka Ri Bhoi District ha ka miet 19 tarik Nailur ki la ioh ban kem noh ia uwei u dkhot ka Seng Hynniewtrep National Liberation Council (HNLC) uba la pyndem wait halor ka jingkynnoh donkti ha kaba leit lum pisa beain na ki hehspah kiba la ioh pdiang ia ki shithi dawa na ka HNLC.

Une u dkhot barim ka HNLC uba la shah kem noh na ka iingsah jong u na Umpling Dongsharum kaba hap hapoh Rynjah Police Station u dei uba la tip kyrteng kum u Sromwell Mawdoh 41 snem rta.

U heh pulit u la ong haka 19 tarik Nailur ba u Sromwell watla u dei uba la wan pyndem hynrei u trei pat kum u ‘over ground worker’ bad donkti ha kaba leit lum pisa na ki hehspah kiba la ioh pdiang ia ki shithi dawa na kane ka Seng.

Nalor kata la iathuh ruh ba u Sromwell u dei uba la wan pyndem ha ryngkat u nongialam barim ka KSU na Nongthymmai u Frederick Kharmawphlang ha ki bor pulit ka East Khasi Hills ha kine ki khyndiat snem ba la dep.

Mynta ki pulit ki la register case pyrshah ia une u dkhot barim ka HNLC namar ka jingdonkti ha kine ki kam beain.