Shah kem u I Love You ba donkti ban pyniap ia u nongniah kali, lap iaka metiap na Jowai Bypass
Ar ngut ki suba donkti ha kaban rahbor bad pyniap dusmon ia u Damehipaia Papeng uba niah taksi kamai na Jowai Ladrymbai kila shah kem noh ha ki pulit jong ka Jowai.
Ka tyllong khubor kaba iohlum ka iathuh ba kine arngut kiba shah kem ki dei u I Love You Talang bad u Ramest Dkhar. U I Love You u dei uwei na ki snar pyniap briew uba la don bun ki case ha Jowai Police Station.
La iathuh ba ki pulit hadien ka jingiohkem ia kine ki ar ngut kila ialam sha ka jaka ba bret iaka metiap u Damehipaia Papeng ha Jowai Bypass kaba hap ha Mihmyntdu, West Jaintia Hills District.
Ka khubor ka iathuh shuh shuh ba une u I Love You u lah ban donkti ruh haka jingshah pyniap u nongniah kali kamai na Jowai Shillong uba kyrteng u Fullmoon Kharsahnoh uba na ka shnong Larnai, West Jaintia Hills Distirct ba niah iaka Maruti Swift Desire kaba don u number ML04 D 1113 uba la jah ryngkat bad ka kali haka 16 tarik une bnai.
Ia ka metiap u Fullmoon la lap haka juh ka sngi haka por mynmiet na Mynkre hajan ka surok ban leit sha Amrit Cement, East Jaintia Hills. Ia ka met u Fullmoon la lap bad suba jur ba ki runar kila teh iaka kti ka kjat bad ot ia u ryngdang da ki kynja tiar ba nep haduh bad ula khlad ha kane ka jaka na ka jinglyngkein ka snam.
La suba jur ba haka jingjia shah pyniap kine ki arngut ki nongniah kali kamai ki dei ki juh ki runar kiba donkti.
U Damehipaia Papeng u dei u nongniah taxi kamai na Jowai-Lad Rymbai, u dei uba na ka shnong Khonshnong bad u sah Mihmyntdu hadien ba ula shongkha bad ka Nidawanroi Rymbai bad ula jahrngai naduh 10 tarik u bnai Nailar.
U Damehipaia ha katei ka sngi ula mih 8:00 am na iing ryngkat bad ka kali kaba don u number ML04 D 2009 bad ka mobile jong u ruh kala switch off. Halor kane kiba haiing kila dep mudui iaka jingujor ejahar ba jah ha Jowai Police Station.
Kiba haiing jong u kiba la wad ia u bad kila poi sha Lumshnong Toll Gate haka 11 tarik Nailar haka por 4 PM. Kila kyrpad iaki nongpyniaid ka Lumshnong Toll Gate bad lyngba ka CCTV la lap ba kali kaba u Damehipaia Papeng u ñiah kala kam iaka toll plaza haka 2:08 Pm haka 10/08/2022, katkum ka shithi ka Synjuk Ki Waheh Shnong looksi Saphai Circle kaba kila ai sha u Superintendent of Police West Jantia Hills dangshen ban kyrpad ban wad ia une u nongniah kali kali kamai.
Ha kaba iadei bad kane ka jingshah rahbor ki kali haduh mynta ki pulit kim pat lap iaki bad ka khubor ka iathuh ba ki pulit hadien ka jinglap iaka met u Damehipaia kila hiar sha Assam halor kane ka jingjia haka sngi Balang.
Ka Dorbar Shnong Khonshnong West Jaintia Hills, ha u kyrwoh bala phah da u Ma Sumarhok Passah, Waheh Shnong Khonshnong, ula pynpaw iaka jingsngewnguh ia baroh kito ki paralok parajor kiba ia don bynta lang ha kaba ia wad ia u Dameihipaia Papeng naduh ka sngi ba u la jah haduh ka sngi ba la lap ia u.
U Ma Passah ula pynpaw iaka jingsngewnguh ia ka Synjuk ki Waheh Chnong Ri Jaintia, Synjuk Waheh Chnong East Jaintia, Synjuk Waheh Shnong Saphai-Iooksi Circle, Balang Presbyterian Mihmyntdu, Kur Rymbai Mihmyntdu, ki nongshong shnong ka shnong Khonshnong, ki paralok parajor bym lah niew kyrteng shuh, bad khamtam iaki Pulit ka East Jaintia bad West Jaintia Hills kiba la trei shitom khlem shongthait haduh ba la lap iaki riew runar
Ha kajuh ka por na ka liang ka shnong ka la pynrem jur ruh ia kito ki riew runar ki riew thrangsnam kiba la kloi ban shim iaka jingim briew tang ban ioh Pisa ban ioh im pahuh. “Kum kito ki jaitbriew kimdei ban ioh ban im laitluid ha sla pyrthei, ka ain ka dei ban pyngngat kyndon bad set shirta jingim ia kum kine ki jait jingjia , khnang ba kitei ki juh ki jingjia kin nym iohlad shuh ban Jia biang hadien habud.”
Ka Jowai-Shillong-Guwahati Tourist Cab Association ka la pynlong ka jingshong kyllaiñ myngngor bad thang mombati ha nongbah Jowai haka sngi Balang kum ka dak ka jingsngewlem bad pynrem ïaka jingshah pynïap dusmon u Fullmoon Kharsahnoh u nongñiah kali kamai tourist na rilum Jaintia
Ia kane ka jingshong kyllain myngngor la pynlong ha Indica Stand.
Ha kane ka jingshong kyllaiñ myngnor la donlang ki bahaïing hasem u (L) Fullmoon Kharsahnoh, ki nongkitkam ka Dorbar Larnai, ki synjuk jong ki nongñiah kali kamai kynthup na East Khasi Hills District, East Jaintia Hills, West Jaintia Hills District kumjuh ki kynhun sengbhalang bapher na rilum Jantia.
U president bad General Secretary ka Jowai-Shillong-Guwahati Tourist Cab Association u Anthony Pohshna bad John Lyngdoh ki ka kyntu ïaki bor ka aiñ ba dei ban shimkhia ïa kum kine ki kam runar khnang ba kum kine ki jingjia kin nym jia shuh nangne shakhmat.
Facebook
Instagram
Youtube
Twitter
Leave a Reply