Shah kem u nong Jharkhand ba shukor pisa haduh palat 19 lak ia u rangbah na Shillong

Syllad | The Rising MeghalayaSeptember 27, 2024

Uwei u briew na Jharkhand u la shah kem noh namar ka jingshukor pisa haduh T.19.27 lak na uwei u rangbah na Shillong da kaba kam thok ba u dei u Assistant Area Manager ka KFC.

U Superintendent of Police ka East Khasi Hills, u Bah Sylvester Nongtnger u la ong ba ki pulit ka District ki la ioh ban kem noh ia une u runar ha ka 27 tarik Nailur hadien ba la register case pyrshah ia uwei u briew uba kyrteng u Abhishek Kumar Yadav hapoh Rynjah Police Station ha ka 12 tarik u Nailar ba la dep halor ka jingkynnoh pynngop ha kaba iadei bad ka investment scheme kaba haduh T.19,27,000.

U la ong ba une u nongmudui u la shah pynngop ban leh ia kane ka skhim da kaba ngeit ba ka dei kaba shisha ha kaba u la siew ia ka installment ba nyngkong ha ka 14 tarik u Jylliew ba la dep bad kiwei pat ki jingsiew ha ki taiew kiba bud, ha kaba kaba u la siew khatduh eh ka long ha ka 6 tarik u Nailar ba la dep.

Hynrei dei tad hadien ka jingiai pynslem kaba la pynlong ia une u nongmudui ba un shem ba u Abhishek Kumar Yadav um don satia kano kano ka jingiadei bad ka KFC bad sngethuh ba u la shah shukor.

“Hadien ka jingtohkit ki pulit ka East Khasi Hills ki la ioh ban kem noh ia u Ibrahim Ansari 59 snem rta na ka shnong Senha, Muslim Mohalla kaba hapoh Lohardaga District ka Jharkhand,” ong une u heh pulit.

Ka jingtohkit mynta ka dang iaid shakhmat ban lapdien ia kiwei pat kiba donkti lang ha kane ka kam shukor.