Shah kem u nongialam barim ka GNLA ba pyniap u nonghikai skul hakhmat ka lok bad kiba haiing

Syllad | The Rising MeghalayaMarch 30, 2025

U Area Commander barim jong ka Seng kieng atiar GNLA (Garo National Liberation Army) Northern Zone Laden Ch. Sangma ba ju khot u Chenang u la shah kem noh halor ka jingdonkti ha kaba pyniap dusmon ia uwei u nonghikai skul hakhmat ka lok bad kiba haiing hasem.

Ha ka 19 tarik Naitung 2012 ha ka por kumba 10:30 mynmiet, ka kynhun jong kumba san ngut ki dkhot ka GNLA hapoh ka jingialan jong u Laden Sangma ki la leit sha ka iingsah jong u Lt. Denybirth Momin ha ka shnong Resu Mepan Abri bad pyniap dusmon ia u shabar ka iingsah jong u hakhmat jong ka kurim bad kiba haiing hasem da kaba kynnoh ba u dei u nongai jingtip jong ki pulit.

U Lt. Denybirth u dei u nonghikai ha ka sobjek Science bad Maths uba pawkhmat bha ha Resubelpara Higher Secondary School.

Saw tylli ki snep kuli ka suloi AK, ar tylli ki snep kuli 9 mm bad kawei ka shithi ba la thoh ha ka kot lyngkdop jong ka seng GNLA ba la soi da u Area Commander ka GNLA kaba la shim ia ka jingkitkhlieh halor kane ka kam pyniap la lapdien na kane ka jaka.

Halor kane ka jingjia ia ka case la register hapoh Mendipathar Police Station, North Garo Hills District ha kaba la pynlong ia ka jingtohkit. Hynrei kane ka case ka la shu sahteng mynta la bun bun snem namar ka jingbym don ia ki sakhi satar kiba biang.

Ha kaba sdang ka jingtohkit halor kane ka jingjia bad ka jinglum ia ki sakhi satar ka long kaba shem shitom na ka bynta ki pulit namar ym don kiba nud ban wan shakhmat namar ka jingtieng kaba la saphriang hapdeng ki paidbah.

Hynrei hadien ka jingtohkit kaba la iai bteng ha kaba khatduh la ioh ban ioh ia ki sakhi satar kiba biang ha kaba iadei bad kane ka jingjia ha kaba u briew uba la shah kynnoh donkti hakhmat eh u dei u Laden Ch. Sangma ia uba la ioh ban kem noh na Baghmara, South Garo Hills District ha ka 27/03/2025 da ka kynhun ki pulit na North Garo Hills.

Ha ka jingtohkit la ioh jingtip ba u Laden Ch Sangma u dei na ka batch kaba nyngkong jong ka seng GNLA bad uba la ioh jinghikai ha khlaw Durama Hills hapoh Garo Hills.

La ioh jingtip ba ha u snem 2012 u la shimti kum u Area Commander jong ka Northern Zone.Shwa ban pyniasoh sha ka GNLA, u la don bynta ha ki kam khaii ia ki wait A’chik (Millam),  ki Stieh A’chik Shield (Sepi), ki jingdeng jong ki A’chik bad kumta u ju poi sha ki shnong bapher bapher ha Garo Hills.

Ha kawei ka sngi u la iakynduh ia u Lt. Sohan D. Shira u nongseng ka GNLA uba dei ruh u dkhot barim ka ANVC ha Nengmandalgre. Hadien ka jingiakynduh kaba khah khah ia u Sohan u la sdang ban iajuh iajan.

Da ka jingai jingmut jong u Sohan u Laden Ch. Sangma lem bad 15 ngut kiwei pat ki la rung sha ka kam lehnoh ha kaba la thaw ia ka seng GNLA hapoh ka jingialam jong u Lt. Sohan D. Shira.