Shah kem u nongialam ka HNYF, kynnoh ba dawa pisa beain na ki trok

Syllad | The Rising MeghalayaOctober 31, 2023

Ki Pulit ka East Khasi Hills, kila kem ia uwei u Nongialam ka seng Hynniewtrep National Youth Front (HNYF) halor ka jingkynnoh donkti ha kaba pyniaid beain ia ki trok kit mar ba kit palat pud da kaba dawa haduh T. 1500 kawei ka trok.               

Une u heh ka Seng uba la shah kem noh u dei uba la tip kyrteng kum u Bah Bless Dkhar, President ka Seng HNYF jong ka East Khasi Hills District.            

Na ka liang u  Superintendent of Police (City) ka East Khasi Hills, u  Bah Vivek Syiem ula ong ba ia u Bah Bless Dkhar la kem noh hynnin ka sngi Nyngkong da ki pulit ka Laitumkhrah Police Station na ka thain Pohkseh.              

Ki khubor ki iathuh ba ki pulit ka Laitumkhrah police station kila register da ka Suo-Moto case pyrshah ia une u briew halor ka khubor bad ki video bala saphriang ha ki rynsan social media, kiba pynshisha ia ka jinglum pisa beain ka jong u na ki trok kit mar, kata da kaba kular ba un iarap pyllait ba kin iaid napoh jingkieng Damsite.     

Katkum ka video kaba la saphriang la iohsngew ruh ia ka jingiakren hapdeng u Bah Bless Dkhar bad uwei u briew ba kam ialade kum u nongkhaii na ka bynta ban iapynbeit halor ka jingpyniaid ia ki trok kit mar lyngba katei ka jingkieng ha kaba u Bah Bless u la kren shai bad pan haduh T.1500 na kawei ka trok ba un pyllait ba kin ioh ban iaid lyngba.