Shah kem u nongialam ka KSU halor ka jingjia ha Ichamati, 6 sngi rai set custody ka iingkashari

Syllad | The Rising MeghalayaApril 27, 2024

Ki pulit ka East Khasi Hills haka 27 tarik Iaiong, ki la kem noh ia u nongialam ka Khasi Students’ Union (KSU) u samla Ostarnic Marbaniang uba dei u Assistant Finance Secretary halor ka jingsuba donkti ha ka jingjia shah pyniap ba dang shen ha Ichamati.

Ia u Ostarnic ba la kem na ka iingsah jong u na Jaiaw la rah noh shapoh Sadar police station bad hadien la ialam hakhmat ka iingkashari kaba la hukum ban set ia u hynriew sngi hapoh ka along ki pulit.

Haduh mynta ki la don sawngut ki dkhot ka KSU kiba la shah kem noh halor ka jingjia shah pyniap ha Ichamati. Shwa kane ki nongialam bad ki dkhot ka KSU ki la ialum shabar ka Sadar police station hapdeng ka jingpyrkhing pahara jong ki pulit.

Na ka liang u Superintendent of Police ka East Khasi Hills u Ritiraj Ravi u la ong, “Ha kaba iadei bad ka Shella P.S. Case No. 08(04)2024 bad Shella P.S. Case No. 09(04)2024 u/s 302/34 IPC, kaba iadei bad ka jingshah pyniap jong u (L) Ishan Singh bad u (L) Sujit Dutta ha Ichamati ki pulit hynne ka sngi Saitjain ki la kem noh ia uwei u suba donkti uba kyrteng u Ostarnic Marbaniang 34 snem rta napoh ka iingsah jong u ha Jaiaw Laitdom, Shillong.

U pulit u buh ruh ka jingkyntu ia ki nongshong shnong ba kin pynneh ia ka shongsuk shongsain, bad ha kajuh ka por u maham ba ki runar kiba donkti ha kaba pynthut ia ka suk ka sain kin ngat ha ka jingshah pynshitom katkum ka ain.

Na ka liang u SP u la ong ruh ba ki la long kiba la pynkhreh ban tehlakam ia ka jinglong jingman baroh.

Lah ban kdew ba ha ka 27 tarik u Lber ba la dep, arngut ki nongtei bylla ki la shah bom iap ha ki runar ki bym lah ban ithuh ha Ichamati.Ia kine ki arngut la tip kyrteng kum u (L) Esan Singh bad u (L) Sujit Dutta.

Ia ki metiap jong kine ki arngut la lapdien na ki bynta jong ka Ichamati na ki bynta ba marjan na Dalda.

Katkum ka ejahar ba la ujor da kiba haiing hasem jong kine ki lanot, la ong ba kane ka jingjia shah pyniap ka la wan jia ha ka por ba la pynlong ia ka jingiakhih pyrshah CAA ha Ichamati.

Dang shen uwei pat u dkhot ka KSU u la shah kem noh halor ka jingdonkti ha kaba iadei bad ka jingshah pyniap jong uwei pat u nongtrei bylla sngi ha ka thain Mawlai Mawroh, Shillong.

Ha kawei pat ka bynta na ka liang ki bor pulit ki la pynjur ia ka jingpahara khnang ban khanglad na kino kino ki jingjia kiba lah ban jia ha ki bynta jong ka nongbah Shillong.