Shah kem u nongtrei restaurant ba pyniap ia ka longkmie ba iatreilang ha Shillong

Syllad | The Rising MeghalayaFebruary 28, 2025

U nongtrei jong kawei ka restaurant ha ka nongbah Shillong u la shah kem noh haka 28 tarik Rymphang hadien ka jingshah kynnoh donkti ha kaba pyniap ia kawei ka longkmie 41 snem rta kaba iatreilang.

Une u briew uba la shah kynnoh donkti u dei uba la tip kyrteng kum u Sunai Singh 42 snem rta uba dei u nongtrei jong ka Trattoria Restaurant kaba don ha Lachumiere.

Ia kane ka jingjia la pyntip nyngkong da u trai jong kane ka restaurant u Bah Batskhem Suting uba la pyntip ba ka nongtrei jong u kaba kyrteng ka Kong Damonica Laloo kaba shong ba sah ha Lawsohtun bad kaba trei kum ka nongpynkhuid hapoh kane ka restaurant la suba ba ka la shah pyniap na ka mala kaba shapoh jong kane ka restaurant.

U Superintendent of Police ka East Khasi Hills, u Bah Vivek Syiem u la ong, “Hadien kane ka jingjia mardor ki pulit napoh Sadar PS ha ryngkat ki heh pulit ki la wan poi ha kane ka jaka. Ka kynhun na ka FSL Crime Scene Unit ruh ka la wan poi bad sdang ban pynlong ia ka jingtohkit. Hadien ka jingtohkit ki pulit mardor ki la kem noh ia u Sunai Singh uba iatreilang ha kane ka restaurant halor ka jingsuba donkti pyniap ia kane ka longkmie.”

Une u briew u la phla halor ka jingdonkti ha kane ka kam pyniap da kaba pynpaw ruh ia ka daw kaba sha lyndet, da kaba ong ba ha ka 27 tarik Rymphang ki la poi sha ka jingiania halor ka jingiadei hapdeng jong ki ha ka por kumba 11 baje mynmiet, kata ha ka por ba u la shoh khawiang.

“Une u briew u la phla ruh ba u la pyrshang ban buhrieh ia ka metiap ha lyndet u transformer jong ka KJP Assembly Conference Centre. Ia u pipe um ba la pyndonkam ha kane ka kam pyniap la ioh ban kurup noh da ki pulit,” ong u SP da kaba bynrap ba ka jingtohkit shuh shuh halor kane ka jingjia ka dang iaid shakhmat ban lap ia ki jingshisha baroh.

U SP u pyntip ruh ia ia baroh ki jingdonkam kiba iadei bad kane ka metiap la pyndep ha katei hi ka jaka bad hadien la pynkynriah noh ia ka metiap shapoh NEIGRIHMS Hospital ban leh ia ka Post Mortem examination lashai ka 1 tarik Lber.

“Ki pulit ki la register case hapoh Sadar PS bad la kem noh ia une uba la shah kynnoh donkti hashwa ban ialam sha ka iingkashari,” u la bynrap.