Shah kem u rangbah ba bat pistol shna hi ha Ri Bhoi District
Ki pulit ka Patharkhmah Police Station, Ri Bhoi District ki la kem noh ia uwei u briew halor ka jingdonkti ha kaba byrgnem siat briew ha ka thain Jirang bad ioh ruh ban kurup noh ia kawei ka pistol shna hi.
Katkum ki pulit la ong ba une u briew u dei uba la tip kyrteng kum u Melan Syngkli 46 snem rta uba dei na ka shnong Umkhawai kaba hap hapoh Jirang C&RD Block, Ri-Bhoi District.
Ki pulit ki iathuh ba uwei u briew uba kyrteng u Tarmal Mawthoh uba dei na ka shnong Umkhawai, Jirang u la ujor sha ki pulit ba ha ka 18 tarik Naiwieng ha ka por kumba 11 PM haduh 12 PM uwei u briew uba kyrteng u Melan Syngkli u la wan sha ka iingsah jong u Suntosh Marbaniang ha ka shnong Umkhawai bad byrngem ban siat ia u Balwan Mawthoh da kaba pyni ruh ia ka pistol.
La ong ba u Melan u la byrngem ruh ban siat ia u Santosh Marbaniang kumjuh ia ka kiaw kurim jong u ka Kong Twilen Mawthoh da kaba pyni ia kane ka pistol shna hi lada ki pyntip ia kane ka jingjia sha ki pulit.
Ki pulit ki pyntip ba ki la shimkhia mardor halor kane ka jingjia bad pynlong ia ka jingtohkit bad leit ban kem noh ia u Melan Syngkli ha kaba ki la ioh ruh ban kurup noh ia ka pistol shna hi lem bad sawtylli ki kuli ki bym pat pyndonkam.
Halor kane ka jingjia ki pulit ki la register case pyrshah ia u Melan Syngkli katkum ka case No. 02(11)2024 hapoh ka kyndon ain 333/351(3) BNS r/ w Sec 25(1A) (1AA) (1B)(a) Arms Act, bad ka jingtohkit mynta ka la iaid shakhmat.
Facebook
Instagram
Youtube
Twitter
Leave a Reply