Shah kem u runar ba lute bad ktahkti ia ka longkmie 70 snem ha Umsohsun

Syllad | The Rising MeghalayaAugust 3, 2023

Uwei u runar ba la kah durkhmat uba la rung jubor hapoh ka ka iing jong ka Kong Janaki Toi 70 snem rta ha Umsohsun Shillong bad thombor ia i da kaba knieh ruh ia ka sati ksiar, ATM Card bad ka mobile phone u la shah kem noh ha ki pulit.

Kane ka jingjia kaba la jia ha ka 29 tarik u Naitung ba la dep ha ka por kumba 6:45 janmiet ka la paw pyrthei hadien ba ka ophis jong u Superintendent of Police, East Khasi Hills, Shillong ka la ioh pdiang ia ka jingujor ha ka sngi kaba bud halor kane ka jingjia.

Na ka liang ki pulit  ki la register case hapoh Sadar PS bad ha ka jingtohkit la suba jur ia ka jingdonkti jong uwei u briew na ka thain Mawblei halor kane ka kam pyntriem. Kumta ruh ha ka 1 tarik mynta u bnai ki pulit ki la pynlong ka jingkhynra hapoh ka iingsah jong u bad ioh ban kem noh ia utei u suba.

Na ka liang u SP East Khasi Hills District, u Bah Sylvester Nongtnger, IPS u la ong ba hadien ka  jingtohkit, une u briew u la phla ia ka jingdonkti ka jong u ha kane ka kam pyntriem ha kaba u la pynpaw ruh ba ia ka sati ksiar kaba ula tuh u la dep ban die noh sha uwei u nongdie ksiar ha Mairang.

Kumta ruh na ka liang ki pulit ki la kem noh ia une u briew bad ialam shapoh ka iingbishar ban leh ia kaba donkam.