Shah kem u samla ba kyrshan ia ka kam thombor ki lehnoh ha Pahalgam

Syllad | The Rising MeghalayaApril 24, 2025

Uwei u samla 30 snem rta u la shah kem noh haka 24 tarik Iaiong na Umlyngka namar ki jingkren kynthoh kiba long pyrshah ri da kaba pynpaw ka jingkyrshan ia ki lehnoh kiba leh ia ka kam thombor ba shyrkhei ha Pahalgam, Jammu & Kashmir kaba wanrah iaka jingiap jong ki 26 ngut ki briew bad bun kila mynsaw.

Ki pulit ka Special Cell ka East Khasi Hills ki la kem noh ia une u briew uba kyrteng u Simon Shylla 30 snem rta na ka iingsah jong u na Umlyngka namar ka jingkynthoh ha ka video ba la pynmih da ka Northeast Live bad ka jingthoh lyngba ka Facebook.

U Superintendent of Police ka East Khasi Hills, u Bah Vivek Syiem u la ong ba une u samla ula ai kyrteng ialade da u ‘Man Shylla’ ha kine ki jingkynthoh.

 Na une u samla ki pulit ki la ioh ruh ban kurup noh ia artylli ki mobile phone bad la register case ia u hapoh Lumdiengjri Police Station ha ki kyndon 113(3)/196(1)(a)/147 BNS.

 U la pyntip ruh ba yn ialam tian bishar ia u haka 25 tarik Iaiong hapoh ka Iingkashari.

“Ha ka jingkynthoh ha Facebook, une u samla ula pynpaw ba ki lehnoh ki dei ban leh ia kaba kum kane ka kam thombor pyrshah ia kine ki jaidbynriew ha ka thain Shatei Lammihngi kaba buh jingma ia ka jingialong kawei bad ka jingiatylli jong ka ri.