Shah kem uba shah kynnoh leh beijot ia ka khynnah ha sor Shillong, dang thwet ia uwei pat

Syllad | The Rising MeghalayaSeptember 2, 2024

Ki pulit ka Laitumkhrah Police Station ki la kem noh ia uwei u briew ba la shah suba donkti ha kaba leh beijot ia kawei ka khynnah ha ka shnong Malki, Shillong ha kane ka sngi Saitjain ba la lah, ong ka khubor pulit.

Na ka liang ki pulit ki dang pynlong ruh ka jingthwet kaba jur ban ioh kem ia uwei pat u paralok jong une u suba donkti uba don mynta hapdeng ka jingphet rieh.

Kane ka sienjam ba la shim da ki pulit ka la wan long hadien ba kane ka lanot ka la mudui da ka ejahar hapoh Laitumkhrah Police Station, da kaba pynpaw ba kane ka jingjia ka la jia haka 31 tarik Nailar bad pynmih ruh ia ki kyrteng jong kine ki arngut ki briew.

Ki pulit  kila ioh ban kem noh ia uwei na kiba shah kynnoh ia uba la tip kyrteng kum u Andy Malngiang 19 snem rta, katba uwei pat uba shah kynnoh donkti lang u dei uba la tip kyrteng kum u u Reuben Mawthoh uba dang don mynta hapdeng ka jingphet rieh.

Ia u Andy Malngiang la phah shapoh ka Judicial Custody na ka bynta 14 sngi hapoh ki  kyndon 351 (3) bad 70 (1) jong ka Bharatiya Nyaya Sanhita (BNS), 2023.