Shah kem uwei halor ka jingjia shah pyniap ba triem ha Umpleng, East Jaintia Hills

Syllad | The Rising MeghalayaJuly 11, 2024

Uwei u briew u la shah kem noh halor ka jingshah kynnoh donkti ha ka kam pyniap ba shyrkhei kaba la jia dang shen ha ka shnong Umpleng, East Jaintia Hills District.

U Superintendent of Police ka District ha u kyrwoh bala pyllait haka 11 tarik Naitung ula ong “Halor ka jinglapdien ia ki sawtylli ki metiap kiba la shah pyniap dusmon ha ki bynta jong ka shnong Umpleng, East Jaintia Hills, na ka liang ki pulit ki la dep ban register case hapoh Khliehriat police station bad ha ka jingtohkit ki la ioh ban kem noh ia uwei u briew uba la shah kynnoh donkti.”

U la ong ruh ba ia mynta hi kim pat lah ban pyllait ia ka kyrteng jong une u briew uba la shah kem noh khnang ba kan ym don ka jingthut ha kaba pynlong ia ka jingtohkit.

 “Ka jingtohkit ka dang iaid shakhmat ban lapdien ia kiwei pat kiba donkti ha kane ka jingjia shah pyniap,” u la bynrap.

Lah ban kdew ba ha ka 6 tarik mynta u bnai ki nongshong shnong ki la lapdien ia ki sawtylli ki metiap kiba la shah teh lang hajuh bad shah pyniap dusmon da kaba shah mait da ki kynja wait na ki bynta jong ki khlieh bad ryndang ha ka thain ba pajih jong ka shnong Umpleng.

Kine ki briew kiba la shah pyniap bad ba la ithuh da kiba haiing hasem ki kynthup ia u Ravi Rai 23, uba dei na ka shnong Patha Elam, Nepal, u Nasar Kyndait 33, na Dkhiah East Pohshnong, East Jaintia Hills bad u Rajesh Rai 26 snem rta uba dei na ka shnong Dharan Sunsari kaba ha Koshi Anchal, Nepal, katba ia ka metiap jong uwei pat ym pat shym la la don ba wan kam haduh mynta.