Shah kerkut bad da wait pom ki runar Bangladesh ia u Chiang Dhar ong u Rahul u lanot ba lait na ka tyrsim ka jingiap

Syllad | The Rising MeghalayaJanuary 9, 2024

Ka Khasi Students’ Union (KSU) Narpuh Circle haka jingialam u president KS Suchiang haka 8 tarik Kyllalyngkot kila ioh ban ia kynduh ia kiba ha ïing jong u (L) Chiang Dhar na Umkiang uba la shah pyniap dusmon ha ki khar Bangladesh. Ia ka niam ka rukom kaba khatduh jong u la pyndep da kaba leit on tep ha u lum jingtep ka Balang Katholik, Umkiang.

Ka seng KSU ka la ioh ruh ban ia kynduh ia u Rahul Pohtam uba dei u paralok ba ia leit lang ha kato ka sngi 6 tarik January 2024 kaba dei ka sngi Saitjain, ka taiew kaba la lah.

U Rahul Pohtam udei uba la lait na ka tyrsim jingiap haki khar Bangladesh, u la iathuh baroh ia kiei kiei kiba la jia ia u bad ia u paralok katba ki dang ap ioh wan ki khar Bangladesh ban tuh kwai.

Ula ong ba kyndit kynsan lawan shi kynhun ki khar Bangladesh khlem poi pyrkhat bad kila shah ker kut bad kim nud shuh ban ia khun bad kila hap ban phet krad.

U Chiang Dhar u la khlad hashen hadien ba ki khar Bangladesh ki la pom ia u da ki wait im im peit peit hadien ba ula sahkut haka ktieh bad um lah shuh ban mareh, iathuh u Rahul. Ula ong ruh ba ialade pat ula ioh rieh ha jaka khlaw bad u iohsngew ruh ba ki beh thong ia u, hynrei ula lait na ka tyrsim jong ki khar Bangladesh bad leit pyntip sha shnong sha thaw.

Ka seng KSU ka pynpaw ka jingsngewsih bad sngewkhia kaba jur halor kane ka jingjia bad kala kyntu iaki bor pulit ban pynlong ka jingtohkit kaba bniah. Na ka liang u Rahul Pohtam u la leit ujor FIR ha pulit Umkiang.

Ka KSU kala pynpaw ba ki nongshong shnong jong kito ki thaiñ khamtam kito kiba don jaka puta kum bri kwai ki shongsyier rit mynsiem bad kim nud shuh ban leit sha ki bri.

Ka KSU kala ong ruh ba ki BSF ba don ha khappud kim leh eiei, kim lah teh lakam ia ka jingioh rung tuh ki khar Bangladesh, katba ki BSF ha highway ki pynheh shadem da kaba pynthut bad leh tohmet ia ki trai ri trai muluk kiba leit ba wan.

Katkum ka jingiathuh ki trai shnong ba ki trai jaka haba ki mut leit bri ki shah pyndik ha ki BSF ba shong pahara, katba ia ki khar Bangladesh ki ioh rung wat haba lah ker sainar, la ong ka KSU bad kala dawa naka sorkar ba ka dei ban phah ia kito ki BSF ba don ha Sonapyrdi bad ha khappud shnong Dona Umbluh bad Ratacherra ba ki dei ban leit sha khappud ban pahara ym ha National Highway.

Ka seng KSU ha kane ka sngi kala leit sngewlem ia kiba ïng u (L) Chiang Dhar uba la iehnoh shadien ia ki ar ngut ki khun bad ka kurim ba la pait dohnud.