Shah khang 12 tylli ki dukan ha Jowai

Syllad | The Rising MeghalayaSeptember 27, 2019

JOWAI: Haduh 12 tylli ki dukan kila shah khang khyrdep hadien ba kim lah satia ban pyni ïaki kot ki sla kiba biang ban khaii pateng ha sor Jowai haka sngi Thohdieng.

Kine ki dukan kiba la shah khang ki dei kiba don ha Iawmusiang.

Ki ar tylli ki sengbhalang kiba kynthup ia ka Hynniewtrep Youth Council (HYC) bad ka Jaiñtia Student Movement (JSM) ha ryngkat ki Pulit jong ka Jowai Police Station, kila pynlong iaka jingkynra ia ka Trading License, Labour License ïaki bar jylla kiba khaii pateng bad buh dukan dukdoh ha Jowai.

Ha kane ka jingkhynra la lam khmat da u Roaming Lamare General Secretary HYC Jaiñtia Hills, u Pilarstone Phawa, Joint Secretary Jaiñtia Students’ Movement bad la ïadonlang ki Pulit naduh ka Dy SP Shahana Mukherjee, B Marak na ka tnad Infiltration Branch.

Na ka 50 tylli ki dukan bar jylla la lap ba 12 tylli ki dukan kiba kynthup ia ki dukan khap sñiuh, dukan suhjain bad kiwei de kim don Trading License kumjuh ruh iaki Labour Licence jong ki nongtrei jong ki. Kumta la phah ia kine ki dukan tad haduh ba ki lah ban pynbiang iaki kot ki sla.

Kane ka jingkhynra ka dei shibynta ban khanglad iaka jingshong beaiñ ki bar jylla ha kane ka thain khamtam hadien ka jingpynmih ïaka NRC ha Assam ha kaba 19 lak ngut ki briew kim shym la rung kyrteng, la ong u Pillar Phawa.

Kine ki ar seng kila ong ba kin sa pynlong shuh ka jingkhynra ha kine ki sngi ban wan namar ba ki suba jur ba dang bun ki dukan bar jylla bym don kot don sla.