Shah khang lynti ka kyrtong Congress, bthah ki nong Karbi ban shim jingbit ban iaid lyngba ka Assam

Syllad | The Rising MeghalayaFebruary 9, 2025

Katba ka jingialap elekshon na bynta ka elekshon sha ka iing Dorbar Thawain jong ka Jaintia Hills Autonomous District Council (JHADC) ka dang iaid shait shait ha ki 29 tylli ki Constituency ka la mih syndet kawei ka jingjia ha ki thain khappud jong ka West Jaintia Hills District bad ka West Karbi Anglong District, Assam haba ki nongshong shnong Karbi ki la pynthut ia ka leit ka wan jong kawei ka kyrtong iakhun elekhon.

Kane ka jingjia kala jia haka 7 tarik Rymphang ha kaba ka kyrtong jong ka seng Indian National Congress (INC) na Barato Mukroh Constituency ka Kong Banikas Laban bad ka kynhun jong ka ki la shah pynsangeh lynti ha ki Karbi ha ka Shnong Umkhyrmi hapoh West Karbi Anglong District, Assam.

Ka Kong Laban bad ka kynhun jong ka, ki dang thmu ban leit sha ka shnong Saba kaba don hajan ka shnong Mukroh na bynta ban leit ialap elekshon hynrei ynda la poi ha ka shnong Umkhyrmi ki paidbah Karbi ki la pynsangeh ia ki bad kylli balei ki leit ialap elekshon na ka shnong jong ki kaba hap hapoh West Karbi Anglong District, Assam. Ki la ong ruh ia ka Kong Laban ba ka dei ban shim jingbit shwa na ki bor pyniaid jong ka West Karbi Anglong District shwa ba kan iaid lynti na ka shnong jong ki.

Ka jingiakren hapdeng ki Karbi bad ka Kong Laban bad ki nongbud ka la neh katto katne por hynrei hadien katto katne ki Karbi ki la shah ia ka ban bteng ia ka jingiaid lynti jong ka sha ka shnong Saba.

Hadien ka jingpynbeit thymmai jong ki Constituency hapoh JHADC da ka Delimitation Committee, ka shnong Mowluber, Psiar, Khatkasla bad kiwei de kaba ju hap hapoh Saphai Constituency ki la shah pynkynriah noh sha Barato Mukroh Constituency. Te kumta ki kyrtong iakhun elekshon ki hap ban leit lyngba ki shnong Karbi khnang ban kham jan ka jingiaid lynti na thain Mukroh sha ki thain Psiar Khatkasla ne na thain Psiar Khatkasla sha thain Mukroh. Lada kim leit da katei ka lynti kin hap ban iaid lyngba ka shnong Sahsniang bad Laskein kaban jngai haduh 30 ne 40 kilometre.