Shah khang san tylli ki karkhana ba khleh dawai iaki Ice Cream ha East Jaintia Hills

Syllad | The Rising MeghalayaAugust 4, 2021

Haduh san tylli ki karkhana shna Ice Cream ha East Jaintia Hills District kila shah khang khyrdep hadien bala lap ba ki khleh dawai iaki Ice Cream da ki dawai iada naka jingsarang ki tiar kaba ktah jur iaka koit ka khiah u briew haka 3 tarik Nailar 2021.

Kine ki karkhana shna Ice Cream kiba shah khang ki dei ka Cream Hills Ice Cream kaba dei trai u  Bimlesh Kumar ba Khliehriat East, Swati Ice Cream kaba dei da u Ashok Sahani bad u Chota Bheem Ice Cream ba dei trai da u Rajiv Kumar Shani kiba na Dkhaih West, MN Ice Cream kaba dei trai u Roitre Phawa bad ka Priceycol Ice Cream kaba dei trai da u Raman Das kiba na Lad Rymbai

“Baroh kine ki karkhana shna Ice Cream kim don satia iaka registration FSSAI ne Food Safety and Standards Authority of India, kaba dei kawei na ki tnad ka Ministry of Health & Family Welfare, Government of India,” ong ka report jong u Bah NA Lynwi, Food Safety Officer, East Jaintia Hills uba la hiar khynra ia kine ki karkhna shna Ice Cream hadien bala bthah ia u da u Deputy Commissioner, East Jaintia Hills haka 2 tarik une u bnai.

U Deputy Commissioner, East Jaintia Hills District ula bthah ia u Food Safety Officer ban khynra ia kine ki karkhna hadien bala ioh iaka report ba don ki khynnah kiba iohkem pang shitmet na kaba bam ice cream bad ban pynthikna ba kine ki ice cream kim dei kiba iabit khniang jingpang COVID-19.

Haka jingkhynra u Bah Lynwi ryngkat ka jingsynranlang ki Pulit ka District ha kitei ki karkhana la lap ba ki pyndonkam iaki dawai ban shna iaki ice cream bad kine ki dawai ki dei kiba la tip kum ka Maruti Chemical Powder, Royal Gold kiba pyndonkam ha ki nar ha ki karkhana ban lait naka jingbam sarang kaba ktah iaka koit ka khiah u briew.

Ka report u Food Safety Officer ka ong ba kine ki karkhana shna Ice Cream kila pynkhein iaka Food Safety Standard Act 2006. Ka report ka ong ruh ba haduh 42 jait ki jait dawai la kurup na ki saw tylli ki karkhana shna ice cream.