Shah khang trei surok ka shnong Lapangap ban pynkhreh Christmas

Syllad | The Rising MeghalayaDecember 19, 2023

Kum shibynta ban pynkhreh iaka Christmas na ka bynta ban pynjem iaka jingeh u paidbah haka leit ka wan, ka dorbar shnong Lapangap kila mih paidbah ban maramot ne ban pyndap iaki thliew ki syar iaka surok khyndew na Khanduli sha Lapangap haka 19 tarik Nohprah.

Pynban kaba lyngngoh, wat la ka jingtrei kala long tang da ka bor shnong, hynrei ki bor Pulit jong ka Assam kila wan ban pynsangeh ia kane ka jingtrei surok u paid nongshong shnong ka Lapangap.

Kane kala wan jia hadien bala don ka jingkynnoh ba don kiba ujor na kaliang ki paid Karbi.

Kumban shu pynkynmaw ba dangshen ka shnong Lapangap ka don hadpeng ka jingshong syier na ka daw ka jingiakynad hapdeng ki paid Karbi bad ki Pnar kaba la wanrah ruh iaka jingiasiat jri siat sim, lun maw bad kiwei kiwei.

Haba kren bad u ma Deimonmi Lyngdoh, Waheh Shnong Lapangap lyngba ka phone, ula ong kane ka jingmaramot surok ka dei kaba ki ju leh manla ka por ha ki aiom tlang ban pyndap iaki thliew ki syar ban khamsuk ka iaid ka ieng. Ula ong kane ka jingpynshna iaka surok kam dei tang na ka bynta ka Christmas, hynrei ka jingpynkhreh ruh iaki ar tylli ki jingiaseng, ka Presbytery Samla jong ka Balang Presbyterian bad ka Proseshon ka Balang Roman Katholik ha u bnai Rymphang bad u bnai Lber.

Wat la shah pynthut haki pulit jong ka Assam kiba la wan da ar kali haka por kumba 2 baje nohphaisngi, hynrei ka jingtrei ban pynbha iaka surok khyndew ka long kaba iaid beit iaid ryntih bad ka jingtrei ka la poi shakhmat ka shnong Langkeroi, la ong u Ma Deimonmi

U ma Deimonmi Lyngdoh ula iathuh ba na ka liang ki bor pyiaid District ki la iakren bad ki nongialam shnong jong ka Lapangap ban pynsangeh noh iaka jingtrei khnang ba kan ym wanrah kano kano ka jinghuri hura bad na ka liang u Waheh Shnong ruh ula pynsangeh noh iaki nongshong shnong artad ba la jan kem dum ka bneng.