Shah khangdam ka surok paidbah ha ki ñiut ki nier, da ka puh shilum hap pynkhuid ka Jowai Municipal Board ha Ladthadlaboh

Syllad | The Rising MeghalayaNovember 21, 2024

Ka Jowai Municipal Board (JMB) haka step 21 tarik Naiwieng kala rah da kawei ka puh shilum bad kawei ka trok ban khat bad weng iaki niut ki nier, ki jaboh jabain kiba la set kut ia kawei ka surok paidbah kaba don ha syndah ka Iawthymme bad Iew CNI, Jowai.

Kane ka la wan long ruh hadien ka jingkyrpad jong ka Dorbar Shnong Ladthadlaboh iaka Jowai Municipal Board (JMB) ba kan pynkhuid ia kitei ki jaboh kiba la satah ha katei ka surok na ka jingbret pathar iaki plastic, ki bitor, ki jaiñjot, ki tiar ba pyndonkam ha ki dukan bad kiwei kiwei de ki jaboh.

Ha kane ka jingleit pynkhuid la donlang ki nongialam shnong ka Ladthadlaboh naduh u Waheh Shnong Ma Aiban Shullai, Chairman JMB Ma Philanderwell Lyngdoh, Special Officer In-charge Market JHADC Ma C.S. Mannar, In-Charge CNI Market Rev. G.S. Shullai nalor kiwei kiwei.

U Waheh Shnong Ladthadlaboh ula ai khublei kyrpang iaka CEO jong ka JMB kaba la pdiang iaka jingtyrwa jong ka Dorbar Shnong ban pynkhuid ia kine ki niut.

Kane ka jaka kamdei tang ka bynta jong ka Ladthadlboh hynrei ka jingkitkhlieh lang da baroh naduh ka JHADC, CNI, ki nongshong iew shong hat, ki nongthied nongpet kumjuh ki nongshong shnong najan najngai kiba wan ban breh niut ha kane ka jaka, la ong u Ma Shullai.

Ula Ma Shullai ula pyntip ruh ba ka Dorbar Shnong kan buh da ki signboard ban maham bad khang pyrshah ia kino kino kiba ju mlien ban bret pathar iaki niut ymtang ha kane ka jaka hynrei wat sha kiwei kiwei ki jaka ruh namar ka jingbret pathar iaki niut ki nier kan ktah iaka koit ka khiah bad pynsniew iaka lyer bad ki um ki wah.

Ha kaba iadei bad ka surok u Ma Shullai ula pyntip ba ka Dorbar Shnong kala dep ban buh jingthoh sha u MLA bad u khmih lynti ba na ka liang u MLA ruh un shimkhia kumba ula kular ban pyntrei ia kane ka surok khnang ba kan long ka surok kaba bit ba biang na ka bynta ban iaid ki kali motor bad ba ki paidbah ruh lait ruh naka jingbret pathar iaki niut nier ha kane ka surok.

U Chairman JMB Ma Philanderwell Lyngdoh ula ong, ka jingbret pathar iaki niut kadei kawei na ki jingpang ba shyrkhei bha hapoh ka shnong Jowai bad ki nongshong shnong ki shim kabu ban bret niut haki jaka ba ki niut ki lang thup. Kumta ula kyntu ia baroh ki nongshong shnong ban don ka jingkitkhlieh bad ban ap iaka kali kit niut jong ka Municipal.

U Chairman ka JMB ula maham ruh iaki riew shim kabu kiba kamai pisa da kaba kit niut da ki kali ha man ki thliew iing bad lada lap ia kiba kum kine ki kali yn pynshitom katkum ka ain bad ula kyntu ruh iaki riew paidbah ban ringdur lada lap ia kum kine kali bad yn ai khusnam ia kiba pyntip.