Shah khot hajir ki 6 shnong ha DC East Jaiñtia, rai ban pynim biang ïaka Lukha

Syllad | The Rising MeghalayaNovember 4, 2019

KHLIEHRIAT: Ka 6 Shnong Wah Lukha Association  ryngkat ka Dorbar Shnong Umkiang, Ka Dorbar Shnong Pyrtakuna, Ka KSU Jaintia Hills District unit bad ka United Hynniewtrep Movement (UHM) kila shah khot hajir ha u Deputy Commissioner (DC)  East Jaintia Hills District Bah FM Dopth halor ka ka jingpulom ka public hearing jong ka Star Cement na ka bynta ban khlong mawshun Brishyrnot ha ka jaka kaba heh 42.051 Hectares.

Kumban shu pynkynmaw kane ka public hearing kaba la khot da ka Megahalaya State Pollution Control Board (MSPCB) haka 19 tarik Risaw kala pulom hadien ka jingpyrshah jong ki sengbhalang bad ki bor shnong.

U DC East Jaiñtia Hills District haka jingïakren bad ki nongialam shnong jong ki 6 shnong bad ki nongialam sengbhalang u la ong ruh ba ïa ki Cements Factory dei ka sorkar kaba pynshlur ïa ki ban seng kharkhana sha thain Narpuh ban pynroi pynpar ïa ka jylla ha ryngkat ban pynïoh kam iohjam ïaki nongshong shnong ka thain.

U Ma Womsar Talang uba long u President jong ka 6 Shnong Wah Lukha Association bad uba long ruh u  Waheh Shnong jong ka Borosra u la pynshai hakhmat u DC ba ha ki por mynshwa kiba haïing hasem jong u ki pyndap pynbiang bad kyrshan ïa u ha ka pule puthi da kaba khwai dohkha na Wah Lukha, hynrei ula pynpaw ka jingsngewsih naduh ba wan ki kharkhana dewbilat haka thain Narpuh ka wah Lukha kala ïap syndon bad kane kala ktah ïaka  jingioh kamai jong kiba haiing jong u.

U Ma Daiapherbha Lamare, Secretary Shnong Sonapyrdi ha kajuh ka por uba long ruh u Secretary ka 6 Shnong Wah Lukha Association ula pynpaw ha khmat u DC East Jaintia Hills kim shym la bud ïaki kyndon aiñ ïada mariang bad ki khlem eiei ban pynkhuid ïak Wah Lukha bad kim la buh ïaki treatment plant ha ki kharkhana bad baroh ka jakhlia kala shu tuid sha wah.

Kane ka jaka kaba thmu ban khlong mawshun na Brishyrnot kam jngai shuh na ka Wah Lukha bad ka Eco Sensitive Zone bad kane kan ktah ïaka jingthaw baim ha khlaw Narpuh namar ba ki khrakhana ki pyndonkam ïaki tiar pynbthei ban khlong mawshun bad dei haloe kane ka nongrim ba ki pyrshah ïaka jingkhlong mawshun ha katei ka shnong, la ong u Daiapher Lamare.

U Waheh Shnong Umkiang Ma Lasting Pala, ula ong hakhmat u DC ba ki kharkhana ki shu kular kum ban leh noh  mynta mynta ban wanrah ka roi ka par bad kumjuh ban aikam ai jam ïaki samla ka thain Narpuh, hynrei ka shu kut haka jingkular.

Mynshuwa ki noingshong shnong jong ka Umkiang ki im ja na ka Wah Lukha, hynrei naduh ba wan ki kharkhana ka wah Lukha kala iap ha kaba kam don jingim shuh. Dei halor kane ka nongrim ba ki pyrshah ïaka ïaka jingkhlong mawshun ha Brishyrnot.

Kiwei kiwei ki bor shnong Pyrtakuna, Shymplong, Lumtongseng kila ieng haka nongrim ban pyrshah ïa ka jingthmu ban khlong mawshun na Brishyrnot namar ka jingwan ki kharkhana ha katei ka thain kam don jingmyntoi ïa u paidbah.

U Deputy Commissioner, East Jaiñtia hills District hadien ba ula ïoh sengew ïaka sur jong ki nongialam shnong na  ki 6 shnong ula pynsngew ban thaw da ka committee kaba kyrpang ban pynkhuid ïaka Wah Lukha  bad kular mang pisa kyrpang lyngba ka DMF bad ban pynim biang ïaka wah Lukha.