Shah ktah jur ki paidbah ka Raid Lyngkhat ba sahteng ka jingshna surok

Syllad | The Rising MeghalayaJanuary 28, 2021

La palat ar-snem kynthih sahteng ka surok kaba leit na Pongtung sha Lyngkhat naduh ba la khlong ia ka rong kaba rim.

Ka jingpyntrei ia ka surok kaba leit na Pongtung sha Lyngkhat ka buh ha ki jingeh kaba khraw ia ki nongshong shnong ka Raid Lyngkhat Khyriem Syiemship hi baroh kawei kiba hap ban iaid ban ieng manla ka sngi na katei ka surok namar ka jing bym shimkhia ki bor kiba ba pyniaid ban pyntrei iaka surok kaba la sah teng la ar snem hadien bala khlong noh iaka surok kaba rim naduh u snem 2018.

Katei ka surok kaba leit na Pongtung sha Lyngkhat ka dei kawei na ki surok kaba ai jingim ia ki paid trai shnong ka thaiñ Riwar hi baroh kawei kiba im na ki kam khaïi pateng bad ki nongrep ruh kumjuh. Shuh shuh katei ka surok dei ka surok kaba lah ban khring ruh ia kiba bun ki nong wan jngohkai kiba na kylleng ki ri ka pyrthei kiba leit iuhkjat ia ka shnong Mawlynnong bad leit lyngba sha ka iew Lyngkhat, ka wah Borhil bad ka jingkieng Dawki.

Kaba lyngngoh ia kane ka surok Lyngkhat ngi iohi ba lah palat ar-snem ruh la shu iehbeiñ bad la shu iai bteng sah ban siang ia katei ka surok tang da ka khyndew na ka wei ka aiom sha kawei ka aiom haduh kat kine ki sngi. Kumta katei ka surok jong ngi ka pynmih ia ki pumpum ki phrit khyndew kiba pynkylla rong bthuh lut naduh ki shnong ki thaw ki iing ki sem ki mar ki mata ki jingthung jingtep kiba don marjan katei ka surok. Ki nongrep kiba hap ban iaid kjat manla ka sngi na katei ka surok ki shem syrtok shibun khamtam ha aiom lyur namar ka ka ktih khyndew ka rben shilynter katei ka surok bad ha ka por synrai, tlang bad pyrem ka jur palat ka pumpum ki phrit kiba her ha ki por ba iaid ki kali.

Kumta kum u wei na ki riew shimet bad u samla u ba shong shnong ha kane ka thaiñ hadien ba nga lah mad ia ki jingeh dalade hi bad nga ioh sngew ia ka jingud jing bynñiaw ki paidbah ka thaiñ kumta nga dap da ka jingsngewkhia bad nga la pyrshang ha i jing bor i barit ban wad ki lad ki lynti ban weng noh ia kitei ki jingeh, hynrei haduh kat kine ki sngi katei ka surok ka dang iai sahteng kumta ngam banse ban shim ia ka lad ban pynpaw sha ki lad pathai khubor khnang ba kin pynsaphriang ia kitei ki jingeh ki paidbah ka thaiñ ka jong ngi bad ban iarap ban pynsngew ruh sha ki bor sorkar kiba dei peit dei khmih ia katei ka surok jong ngi.

Ha shuwa ka Khristmas bad Snem thymmai la iohi ba ki la sdang ban pyntrei tang harum Pongtung khyndiat bad la shu pynsangeh biang ia katei ka kam katba ia ka surok Lyngkat haduh mynta ym pat don ki dak ban pynsiang rong.

Shuwa ban pynkut nga sngewbha ban pynpaw lyngba une u kyrwoh da ki jingkyrpad rit sa shisien ia ki tnad treikam kiba dei peit ia ka tei ka surok bad ki bor bahalor kiba peit ia peit ia ka bha ka miat u paidbah ka thaiñ jong ngi ba kin sngewkhia ban phah pyntrei kloi bad pyntrei bha ia katei ka surok ka thaiñ jong ngi khnang kan long ka jingkyrkhu ia ngi ki paidbah kiba donkam ban iaid lynti manla ka sngi.

Da u Melajied Khongbuh,
Nongtyngur, Raid Lyngkhat Khyriem Syiemship