Shah ktah kti ki paid khappud haki briew ka sorkar Assam

Syllad | The Rising MeghalayaFebruary 5, 2019

JOWAI: Ka jinglehdonbor jong ki ophisar ka tand kam Khlaw ka sorkar Assam ha shnong Khanduli ka dang iai bteng bad la kynnoh ba kine ki ophisar kila ktah kti ruh ïaki paidbah haka sngi Nyngkong.

Kane kan dei ka sien kaba ar tang ha u bnai Kyllalyngkot bad Rymphang jong une u snem ba ki paidbah ka thaiñ khappud kin shah pyndik bad shah ktah kti ha kine ki briew sorkar bad kila rah ruh ïaki tiar kum ka wait ka kurat ot dieng jong ki nongshong shnong ha khappud.

Ka thymmei khubor kaba thikna ka ïathuh ba ki katto katne ki nongshong shnong ka Khanduli kila leit Thohdieng haka khlaw Iangmiih kaba ïasam pud bad ka Meghalaya bad West Karbi Anglong, Assam.

Hynrei kine ki briew sorkar kiba wan na Hamren, Umpawiang bad Mokoiram kilam kam trai ïa katei ka jaka bad maham ïaki nongshong shnong ba kim dei ban pom dieng na katei ka khlaw.

La ïathuh ba kila beh krad bad rah ïa ki tiar naduh ka wait ka kurat jong ki trai shnong ba ot dieng ha ka khlaw Iangmih, kaba ka shnong Khanduli kala ïoh jingbit na ka Jaiñtia Hills Autonomous District Council (JHADC) ban ot dieng thang ban pyndonkam ha ki ïing ki sem jong ki.

Ka Khanduli manla ka snem da ka jingbit na ka konsil (JHADC) kila leit ban thyllem dieng thang bad kam don kano kano ka jingpynwit na kino kino ki bor, hynrei mynta ki ophisar ka kam khlaw ka Assam kila wan leh trai khlieh bad kam trai ïa katei ka jaka kaba don marjan bad ka Mokoiram.