Shah ktah palat 9000 tylli ki masi na ka jingpang sniehdoh, Kular aijingiarap ka sorkar

Syllad | The Rising MeghalayaSeptember 19, 2023

Ka sorkar jylla ka la pynthikna ban siew ia ka bai lutksan sha ki nongri masi hadien ba palat 9000 tylli ki masi kila shah ktah ha ka jingpang sniehdoh ba la tip kum ka Lumpy Skin Disease (LSD) hapoh ka jylla.

Haba jubab hapoh ka dorbar Assembly mynta ka sngi ba Ar, na ka liang u Myntri ba khmih ia ka tnat Animal Husbandry and Veterinary u Bah A.L Hek u la ong ba ia mynta hi na ka liang ka sorkar kam pat shym la ai satia kino kino ki lad jingiarap pisa sha kine ki nongri masi kiba la shah ktah ha kane ka jingjia ia ki jingri jong ki.

Hynrei, hadien ba u nongmihkhmat liang pyrshah ka VPP napoh Nongkrem u Bah Ardent M Basaiawmoit u la pan jingtip la ka sorkar kan siew ne em ia ka bai lutksan sha kine ki nongri masi kiba la shah ktah bad kiba la hap ban khang khyrdep noh ia ki jaka ri ne farm namar ka jingshah syllad ha kane ka jingpang LSD, na ka liang u Bah Hek u la ong ba na ka liang ka sorkar kan siew ia ka bai lutksan sha kine ki nongri masi kiba la shah ktah.

Na ka liang une u Myntri u la ong ruh ba ki la don haduh palat 9000 tylli ki masi ha ka jylla kiba la shah ktah ha kane ka jingpang sniehdoh. Ha kajuh ka por u la pyntip ba sawtylli ki veterinary hospitals bad 125 tylli ki dispensary ki la iarap ban ai dawai bad ai tika injek na ka bynta kine ki jingri ban ialeh pyrshah ia kane ka jingpang.

Shuh shuh ha kawei pat ka liang une u Myntri u la pyntip ba la siew ia ka bai lutksan kaba long T. 16,20,000 sha ki nongri jingri ha ka snem 2020-21 namar ka jingiap  jong ki 540 tylli ki sniang na ka jingpang African Swine Fever disease.

Halor ka jingkynnoh u MLA ka Nongkrem ba kane ka jingpang swine flu ka la wan jia naduh ba ka sorkar ka la sdang ban sam ia ki khun sniang kiba la wanrah na shabar ka jylla, na ka liang u Bah Hek u la ong; “Ngim pat dei satia ka jylla kaba lah ban pynbiang da lade hi ha kaba iadei bad ka jingpynmih khun sniang bad ngi dang hap ban shaniah na shabar ka jylla.”