Shah kynnoh ka Shillong Press Club ha ka seng khang bam doh Masi bym ai jingbit pynlong jingialang

Syllad | The Rising MeghalayaSeptember 13, 2024

Ka kynhun Seng Hindu jong u Shandkaracharya Swami Avimukteshwarananda Saraswati Maharaj hapoh ka jingialam jong u Brahmachari Mukundanand haka 12 tarik Nailur ka la kynnoh ia ka Shillong Press Club (SPC) ba kam shym la ai jingbit satia na ka bynta ban pynlong ia ka jingialang bad ki lad pathai khubor.

Kumta kane ka Seng ka la pyndonkam noh da ki lad pathai khubor paidbah ban phah iaki video ban pynbna halor ka jingthmu ka  jong ki ban pynbna ia ka  jingiaid Yatra ban pynbna khang bam doh Masi bad ai kyrdan ia ka masi kum ka Kmie jong ka Ri.

Na kaliang ka Shillong Press Club ha u kyrwoh kala kyntait mardor ia kane ka jingkynnoh jong kane ka kynhun, da kaba pynpaw ba dei ma ki kiba pyndam ia ka press conference ha ka minit kaba khatduh.

Ka SPC kala pynpaw ka jingsngewkhia halor kane ka jingjia kaba la jia shabar jong ka Club haka 12 tarik Nailur ha kaba la iohi ia ki dkhot jong ka Seng Hynñiewtrep Youth Council bad ki pulit ka Jylla ba ki la ia lum lang shabar jong ka Press Club halor ka press conference kaba la thmu pynlong da u nongmihkhmat jong u Jagadguru Shankaracharya Swami Avimukteshwaranda Saraswati.

Na ka liang ka SPC ka kwah ban pynsngew ba ka Club ka dei ka kynhun kaba laitluid bad kaba khlem liang ha kaba uwei pa uwei u briew bad ka kynhun, khlem da khein ia ka jaitbynriew,  ka jingngeit, ka shnong ka thaw, ka kolshor, bad ka niam la pdiang sngewbha ban pynlong ia ka jingialang bad ki nongthoh khubor halor kino kino ki mat.

Ka jingdon jong ki pulit bad ki nongialam bad ki dkhot jong ki seng treimon sngewbha ha kane ka sngi ka la pynhiar dor ia ka iktiar bad ka jinglong ba janai jong ka Shillong Press Club, kat haduh ba la kynnoh ia ka Club ba ka la pynsangeh noh ia katei ka jingialang bad ki nongpathai khubor kaba la thmu ban pynlong.

Ka SPC kala pynshai ba ïa ka jingïalang bad ki nongthoh khubor ba la thmu la pynsangeh noh da u Bramachari Mukundanand uba dei u nongialam ka kynhun khang bam doh masi.

La ong ruh ba ki nongïalam ka HYC ki la pyntip ba ka rai jong ki ban wan sha katei ka Club ka long ban pyrshah ïa ka jingpynbna jong katei ka seng ban pynlong ia ka yatra- ka Gau Dhwaj Sthapana Bharat Yatra ban pynbna ïa ka Masi kum ka Kmie jong ka ri. Ka SPC kala pyntip ruh ba kam juh ai kano kano ka jingthoh ban ai jingmynjur ban pynlong press conference

Na ka liang u President ka SPC u la phone da lade ïa ki dkhot jong ka Jagadguru Shankaracharya Swami Avimukteshwaranda Saraswati ban kylli bniah halor ka jingslem jong ki ban poi ha Club, pynban kila kynnoh kylla ia ka SPC kaba long khlem nongrim.

Shuh shuh kane ka kynhun jong u Jagadguru Shandkaracharya ba la ialam da u Brahmachari kala pynbna ruh ba kan pynlong ia ka yatra naduh ka 22 tarik ha kylleng ka ri ban pynbna khang bam bad shoh doh masi bad ha Shillong kane ka yatra kan long haka 2 tarik Risaw u ban wan.

Kane ka yatra kan long ha baroh ki jylla bad kan sdang na Ayodhya bad yn pynkut ha nongbah Delhi ha ka 26 tarik u Risaw 2024.