Shah kynnoh thmu lehbor u CEM JHADC ïaka kynthei ha Delhi; hato kadei ka plan Politik?
JOWAI: U Chief Executive Member (CEM) jong ka Jaiñtia Hills Autonomous District Council (JHADC), U Ma Madonbai Rymbai ula shah kynnoh ba u thmu ban lehbor ïa kawei ka kynthei kumba lai bnai mynshwa ha Nongbah Delhi.
Kane ka kynthei haka 12 tarik une u bnai Rymphang kala mudui da ka jingujor ejahar ha Women Police Jowai Police Station pyrshah ïa U Ma Madonbai Rymbai bad kynnoh ba u thmu ban batbor ïaka ha nongbah Delhi, hynrei tang hadien shi sngi la weng noh ïaka jingujor.
![](https://www.syllad.com/wp-content/uploads/2024/09/JIT-Vacancy-823x1024.avif)
U Superintendent of Police West Jaiñtia Hills District, Bah Lakador Syiem ula ong ba ki la ïohpdiang ïaka jingujor ejahar haka 12 tarik une u bnai bad kila phah noh ïaka sha ki Pulit Delhi naka bynta ka jingtohkit.
Ula ong ba katkum ka ejahar, kane ka jingjia kala jia ha u bnai Naiwieng 2018 bad kynnoh pyrshah ïa u CEM JHADC.
Katkum ka ejahar kaba la ujor katei ka kynthei ha Women Police Station, Jowai ba u Ma Madonbai bad u paralok jong u ki la ïalam ïa ka sha Delhi bad haba poi sha Delhi ula thmu ban lehbor ïaka, hynrei kala lait da ka said.
Haba la wan phai ula phone bad pan map kumjuh ula kular ban aikam ïaka ha JHADC bad ula ong ba kam dei ban phla ïa kane ka jingpyrshang batbor jong u ïa ka. Dei namar jingtieng kam shym la ujor ejahar pyrshah ïa u, hynrei hadien ba kala pyrkhat janai kala rai ban ujor ejahar.
Kaba phylla tang hadien shi sngi kane ka kynthei kala weng ïa ka jingujor bad kala ong ba kala ujor ejahar namar ka jingdom. La pynpaw ba kala weng ïaka ejahar da ka mon laitluid bad ym don mano mano ba pynbor ne ai jngmut ïa ka.
U Ma Madonbai u la dep shim bail naka ïingbishar jong ka District 15 sngi.
U Ma Madonbai Rymbai, u la kyntait mardor ïa kane ka jingkynnoh kane ka kynthei bad ula ong ba “kadei tang ka jingpharep bad pynjah burom ïa nga. Nga suba jur baka dei ka jingkynshoit jong no re jong no bad ki dei ki nongshun haka kam politik jong nga”.
U MDC ka Khliehtyrchi-Sohmynting MDC ula ïathuh ba haka jingleit Delhi jong u ha bnai November, mynshem snem ula mih marwei bad ïakynduh ïaki paralok MDC ka Musniang Rngad u Phasmon Dkhar, ka MDC jong ka Khliehriat Rymbai MDC ka Kong Violet Lyngdoh bad katei ka kynthei.
Haka por kaba u don sha Delhi u khlem rung ha ka kamra ha Hotel ba sah katei ka kynthei bala kynnoh pyrshah ia u. U ma Madonbai u la ïathuh ba ka Kong Violet bad katei ka kynthei ki la rung tang shiphang ha ka kamra ba sah ma u bad u ma Phasmon u don ryngkat ha kata ka por.
U ma Madonbai U MDC Sohmynting Khliehtyrshi un ïakhun para marwei bad u kyrtong shimet u Ma Lakhon Dkhar ha kane ka elekshon MDC sha ka ïing dorbar thawaiñ ka JHADC, kaban long haka 27 Rymphang.
U ma Madon dangshen ula kynnoh ba u MLA ka Nartiang u ma Sniawbhalang Dhar u la shet kylla ïa u bad kyrshan ïa u Ma Lakhon Dkhar ha jaka ban kyrshan ïa u kum u kyrtong ka party.
Leave a Reply