Shah lied biang ka ïingmane Presbyterian Umdihar ha ki runar, rong ia ka pisa bad ki jingdon jingem

Syllad | The Rising MeghalayaMay 18, 2024

Ki nongialam ha ryngkat ki nongkitkam ka Committee jong ka Balang Presbyterian Umdihar kaba kynthup naduh ki Rangbah, Jingiaseng Kynthei bad CE Society ki la pynpaw ka jingsngewsih kaba jur halor ka jingbteng ka jingshah tuh bad shah pynjot ka ïingmane kaba don ha ka shnong Umdihar, Ri Bhoi District.

Kane ka dei ruh ka sien kaba saw ha kaba kane ka ïingmane jong ka Balang Presbyterian Umdihar ka la shah kyndang bad shah tuh ha ki runar.

Katkum ka jingtip na ki bor pyniaid ka Balang Presbyterian Umdihar la ong ba kane ka jingjia ka la jia ha ka shiteng synia jong ka 17 Jymmang, ha kaba ki snar nongtuh bym lah ban tip ki la phrong jubor hapoh kane ka ïingmane da ka lied jubor ia ka jingkhangiit da kaba pyndonkam da ki kynja nar bad rung shapoh ka iingmane bad leh dusmon ia ki tiar kyntang bad rong tuh ia ka pisa kynshew, ki khiew syntiew bad katto katne ki tiar ba pyndonkam na ka bynta ki jingiaseng kyrpang.

Ha kren sha ki lad pathai khubor, u Bah RB Shadap u wei na ki Rangbah Balang u la iathuh ba kum ka balang hi baroh kynthup naduh ki Rangbah Balang, ki Tymmen Basan, ka Jingiaseng Kynthei bad CE Union, ki dap da ka jingsngewsih kthang halor kane ka jingjia shah rong tuh bad ka jingshah leh dusmon ki tiar ki tar bad ka iingmane hi ba la leh da ki runar ki bym lah ban ithuh satia.

U la iathuh ruh ba kane ka jingjia phrong tuh hapoh kane ka iingmane kam dei shuh ka sien ba nyngkong, hynrei la iai jia na kawei ka por sha kawei ha ki snem ba la leit noh. Ka Balang hi ka shu sngap ia kine baroh hynrei dei ha kane ka kynti ba ki dkhot ka Balang kim lah shuh ban shu sngap jar bad kumta la rai ban aiti sha ka Dorbar Shnong ban leh ia kaba donkam bad ban ai sha ki bor ka ain da kaba ujor ejahar halor kane ka jingjia.

Nalor kata une u rangbah u la iathuh ruh ba kine ki runar ki la rong noh ia ka pisa ba la lum kynshew ha ki jingiaseng, ki khiew syntiew ba rem dor bad ki la pynjot ruh ia ki tiar tem jong ka CE Union bad rah ia ki tiar kyntang ba ju pyndonkam ha ki jingiaseng kyrpang. Ula ong ruh ba na ka liang ka Balang hi ka shaniah mynta ha ka jingstad jong ka Dorbar Shnong Umdihar ban leh ia kaba donkam.