Shah lun maw bad shah thang kawei ka ïing ha West Jaintia Hills ba suba ri Taro

Syllad | The Rising MeghalayaMay 16, 2022

Ha kane ka juk shai bad ka juk ka technology, pynban ka jingngeit ha u Khasi Pnar haduh kine ki sngi iaka kam ri blai iung, taro, thlen, bih, kynbat ka dang iai neh sah bad kaba la pynklumar ia kiba bun haka imlang sahlang. Ki briew kiba shah suba ba ri ‘blai iung’ ne taro ki im ha pdeng ka jingim kaba syrtok bad kila hap ban mad iaka jingshah tait shnong bad shah beh shnong.

Ka jingjia kaba dang shu jia shen kala jia haka shnong Saba, ka shnong kaba hap ha khappud Assam Meghalaya kaba don hajan ka shnong Mukroh.

Kane ka longïing na ka shnong Saba, West Jaintia Hills District kaba dei na ka kur Phawa la kynnoh ba ka ri taro hadien ba la kem pang katto katne ngut ki khynnah ha katei ka shnong.

La kynnoh ba ki briew kiba ym lah ban ithuh kila lun maw iaka iing kane ka iing kaba dei jong ka kong Kong N Phawa bad Kpa u Ma N Nartiang kiba don 9 ngut ki khun haka miet sngi Saitjain, ka taiew kaba la dep kaba la wanrah ka jingjulor kaba bun.

Katba ki trai iing ne ki khun ki kti kane ka iing pat kila phet rieh ialade sha ki khlaw kham pajih na shnong ban iada na ka jingim.

U Ma Chillangki Phawa Secretary ka Kur Phawa-Siangshai Mukroh Saba Maitdeiñ Unit, haba ïakren bad u nongthoh khubor ula ïathuh ba haka shnong Saba la don katto katne ngut ki khynnah kiba ngat jingpang ksuid bad ki la kynnoh ba dei katei ka longïing kaba leh ïa kane ka kam ba sa pang kitei ki khynnah.

Ula kynnoh ba haka miet sngi Thohdieng katba ka Kmie bad u Kpa ki dang leit shim dawai iaki khynnah ba kem pang sha ka thain Karbi Anglong kaba ki hap sah miet ar sngi Thohdieng bad Saitjain, ki nongshong shnong ki la siat da ka jri siat sim ïaki khun jong ka bad ki khun jong ka hapdeng u slap ba jur ki la phet rieh sha khlaw.

Shuh shuh ula kynnoh ba haka sngi Saitjaiñ ki nongshong shnong ki la tangon pat da maw ïaka ïing jong ka bad hangne ruh ki la ïakrat biang sha khlaw.

Shuh shuh ula iathuh ba ka bor shnong Saba kala shim syndon ïaka rai ban beh shnong ïa katei ka longïing bad lada kim mih na katei ka shnong la maham ban pynshitom ïaki.

U Ma Chilangki Phawa uba dei u Kñi ka Kur ula leit ïakynduh ïa u waheh shnong ka Saba na ka bynta ban pyrkhat ïaka bha ka miat jong ka Kur, pynban la shah suba bad shah kynnoh sniew.

Hadien kane la iathuh ba heh kur ka Phawa Siangshai kila hiar sha katei ka shnong ban iakren halor kane ka jingjia, pynban haka por mynmiet la kynnoh ba katei ka iing kala shah thang noh ha ki briew kiba ym lah satia ban ithuh.

Haduh bala thoh iaka khubor kam pat don kano kano ka jingujor sha ki pulit.