Shah lynthem maw ka iing bad ka kali u Vice Chancellor NEHU

Syllad | The Rising MeghalayaNovember 10, 2024

Ka jinglong jingman ha ka skulbah North Eastern Hill University (NEHU) ka la nangkham sniew shuh shuh katba ka jingiakhih jong ki samla pule ka dang iai bteng bad kynjoh sha ka sngi kaba hynriew mynta ka 10 tarik u Naiwieng.

Hapdeng kane ka jingkhihwin la sakhi ruh ia ka jingshah ther maw ka iingsah jong u Vice Chancellor ka NEHU u Prof PS Shukla ha ki riew runar ki bym lah ban ithuh kiba la lynthem maw ruh ia ka kali kaba pynieng hapoh ka phyllaw ka iingsah jong u.

Kane ka jingjia ka la jia ha ka shiteng miet ne ka step phyrngab jong ka 10 tarik u Naiwieng hapdeng ka jingshong shah thngan jong ki smala pule ba la ialam da ka North Eastern Hill University Students’ Union (NEHUSU) bad ba la kyrshan da ka Khasi Students’ Union (KSU – NEHU Unit) kiba la dawa hiar shuki mardor ia u VC bad ban weng kam mardor ia u Regsitrar bad Deputy Registrar.

“Na ka liang u Acting Registrar ka skulbah u la mudui da ka ejahar ha kaba iadei bad kane ka jingjia bad na ka liang ki pulit ki la register case halor kane ka jingjia,” ong u SP (City) u Dara Ashwagosh uba la pyntip ruh ba la phah ia ki bor pulit ban pahara ia ka iingsah jong u VC.

Haba kylli u SP u la ong ba u VC um shym la don satia ha la ka iingsah ha ka por ba kine ki jingjia shah thombor ki la wan jia.

“Haba ngi la leit ban sha kane ka jaka, u VC um shym la don satia ha katei ka jaka sah,” ong u SP da kaba bynrap ba ki pulit ki la pynlong ka jingtohkit halor kane ka jingjia bad ruh halor kane ka jingbym don jong u VC. U la ong ba ka jingtohkit ka dang iaid shakhmat bad ba kim pat shym la kem iano iano ruh ha kaba iadei bad kane ka jingjia.

Kham hashwa u SP nalor ki District Magistrate ki la pynsangeh ruh ia ki samla pule kiba thmu ban pynlong ia ka jingiaid paidbah ba jai jai lyngba ka iingsah jong u Vice Chancellor.

Ia kane ka jingiasid paidbah ba jai jai la khot pynlong da ka Research Scholar Forum jong ka NEHU kiba kyrshan ia ka jingdawa jong ki samla pule kiba pynlong jingiakhih.

U President ka Research Scholars Forum NEHU, u Superior Syngkli ula kynnoh ba u VC ula jah rngai naduh ka miet 9 tarik Naiwieng. “U Chief Security Office jong u VC ula kular ha ngi ba yn sa mudui da ka ejahar namar u VC ula shu jah rngai khlem da aplai ia ka shuti” ong u Syngkli.

U Syngkli u la ong ruh ba ki research scholar ki ai ka jingkyrshan kaba pura ia ka NEHUSU kiba dawa ia ka jinghiar shuki kaba mardor jong u Vice Chancellor ka NEHU.

Lah ban kdew ba na ka liang ki samla pule kiba pynlong jingiakhih ki la kyntait ia ka jingkhot iakren biang jong u VC na ka bynta ban pynbeit halor ki jingdawa ki jong ki da kaba ong ba kin wan sha ka jingiakren tad hadien ba une u VC un hiar shuki noh.