Shah patrong bad maham siat ki shipai BSF ia u doktor ha Lakroh

Syllad | The Rising MeghalayaFebruary 11, 2024

Uwei u doktor jong ka tnad Veterinary, ula kynnoh ba ki shipai BSF haka thaiñ Lakroh, ka shnong kaba don ha khappud India Bangladesh ki la patrong jubor ia u bad patom iaka sopti jong u ryngkat ka jingmaham siat ia u haka 11 tarik Rymphang.

Une u doktor u dei u Dr. Seiboklang Buam na ka shnong Muktapur bad u dei u ophisar incharge Veterinary Dispensery, Muktapur.

Kane ka jingjia kala jia haka por kumba 12 baje mynsngi haka surok Muktapur-Jaliakhola, kaba hap hapoh ka BOP Hawai Tilla, West Jaintia Hills District. La iathuh ba ki shipai BSF khlem kino kino ki daw kila patrong ia u bad kynnoh ba u dei u nong Bangladesh katba u dang wan khwai na Wah Lakroh.

Une u doktor ula kam ba u ju iatreilang bad ki shipai BSF man ka por haba don kino kino ka jingjia pynban mynta ka sngi haba kila lap ia u kila tohkit kumba udei u nongrung tuh ne u khar Bangladesh.

Une u doktor ruh ula iania bad ki bad phah iaki ban kem ia ki masi tuh bad haka juh ka por u ring dur da ka mobile, kine ki BSF kila knieh noh iaka mobile jong u bad maham ban tan ia u sha zero point bad siat iap ia u.

Shuh shuh une u doktor ula kynnoh ruh ba ki shipai ki thmu ban law lyngkhuid ia u bad phah panmap da kaba ktah ha sla kjat jong ki.

Halor kane ka jingjia ki nongshong shnong kane ka shnong kila pynpaw iaka jingsngewkhia kaba jur halor ka jingleh heh bad pyndik ki shipai iaka leit ka wan u paidbah bad ktah iaka burom ka ijot jong ki.