Shah pom pathar ki dieng ha ka khlaw Raid Bhoirymbong; hiar jurip ki ophisar bad ki 2 shnong

Syllad | The Rising MeghalayaNovember 12, 2024

 Ki ophisar na ka Riat Khwan Beat House ha ka jingdon lang ki riew rangbah na ka shnong Lumdaitkhla bad Lumsohpieng kiba hap hapoh Bhoirymbong ha ka 11 tarik Naiwieng ki la leit ban jurip ia ka khlaw Raid jong ka Bhoirymbong Pyllun hadien ba ki riew shim kabu ki la pom pathar ia ki deing ki sien hapoh kane ka khlaw.

Ha kane ka jingleit jurip ba la ialam da u Bah S. Pynrope, Beat Forest Officer la ia don ryngkat lang ruh u Bah Aibor Jyrwa na ka shnong Lumsohpieng, u Bah Tynshain Makri na ka Shnong Lumdaitkhla nalor kiwei kiwei ki riew rangbah na ka shnong Lumdaitkhla bad Lumsohpieng.

Ha kane ka jingleit jurip ki la lap shisha ba ka la don ka jingpom pathar ia ki dieng ki siej ha katei ka khlaw raid bad ki la ioh ruh ban kurup ia ki dieng ba la dep ban pom da ki phew tynrai, ha kaba kitei ki ophisar na ka tnad Forest ki la leh ia kaba donkam katkum ki kyndon ain.

Haba kren sha ki lad pathai khubor u Bah Aibor Jyrwa u la ong ba kum ki nongshong shnong ki sngewkhia jur ban ïohi ba ki riew shim kabu kiba la nud ban pom pathar ia ki dieng hapoh katei ka khlaw Raid bad kane ka la long shisha ka jingpynjor ia ki khlaw ki btap jong ka shnong.

Ha kajuh ka por u Bah Aibor Jyrwa u la ai ka jingiaroh ia ka Tnad khlaw kiba la shimkhia ban wan jurip da lade khnang ban lap ia ka jingshisha, bad ha kajuh por ki la kyrpad ruh ia ka tnad khlaw ba kin shimkhia na ka bynta ban pyngngat ha ki kyndon ain ia kito ki riew shim kabu kiba donkti ha kane ka kam bymman.