Shah pyndem tdong biang ka Jylla Meghalaya ha ka Jylla Assam ha ka Shnong Khanduli

Syllad | The Rising MeghalayaOctober 3, 2019

KHANDULI: Sa shisien ka Jylla Assam ka la pyndemtdong ia ka Jylla Meghalaya ha ki jaka iakajia khappud bad mynta ka sngi ka la jia biang ha ka shnong Khanduli kaba hap ha ki khappud jong ka Assam bad Meghalaya, haba ki bor pyniaid district jong ka West Karbi Anglong District ki la pynsangeh noh ia ka jingpom dieng na ka khlaw jong ka Jaintia Hills Autonomous District Council (JHADC) kaba don ha Khliehlangho, Khanduli hapoh Nartiang Assembly Constituency.

Ka tnat forest jong ka JHADC ha u bnai Nailur (September) mynta u snem ka la lilam ia ki dieng kseh kiba la pynheh pynsan ha ka jaka khlaw jong ka ryngkat ha ka jingiatreilang bad ka Dorbar Shnong Khanduli sha u Ma Lieh Surong na ka shnong Mynsngat.

Utei u briew u la sdang ban pom ia kitei ki dieng kseh la kumba ar ne lai taiew hynrei kyndit kynsan ha nohphai sngi jong ka Sngi Balang la wan poi kynsan shi kali ki nongtrei tnat forest jong ka Karbi Anglong Autonomous Council (KAAC) bad ki la phah ia ki nongtrei kiba don ha katei ka jaka ban sangeh noh ka jingpomdieng bad dawa ruh ia ki kot sla na ki.

Ki nongtrei ki la pyntip mardor ia kane ka jingpoi ki briew na Assam sha ki nongpyniaid shnong jong ka Khanduli bad na ka liang jong ki nongpyniaid shnong ki la ai jingtip sha ki pulit ha Saitsama OP bad ha kajuh ka por ki la leit noh shatei ka jaka.

Ki pulit jong ka Saitsama OP ki la poi sha katei ka jaka hadien katto katne por bad ki la iatainia bad ki nongtrei jong ka tnat Forest jong ka KAAC da kaba ong ba katei ka jaka ka dei hapoh Meghalaya. Ki nongtrei tnat Forest jong ka KAAC ha ka jingbanse ki la leit phai noh bad ka kam jingpom dieng ka la bteng.

Ki nongtrei ka tnat Forest jong ka KAAC ki la ai jingtip halor kane ka jingjia sha kiba heh jong ki bad na ka liang jong ki ki la bthah ia ki bor pyniaid jong ka West Karbi Anglong District ban shimkhia ia katei ka kam bad na ka liang ki bor pyniaid district ki la ai jingtip sha u SP jong ka West Jaintia Hills ban don ka jingjurip lang mynta ka sngi.

Ha katei ka jingjurip, u DSP Headquarter u Bah M Marngar ryngkat bad ka kynhun pulit ki la leit hiar sha katei ka jaka katba u magistrate bad u DSP ryngkat bad hynniew kali ki pulit bad nongtrei forest jong ka KAAC ki la poi sha katei ka jaka.

Hadien ka jingiakren kaba la neh katto katne por hapdeng U DSP West Jaintia Hills bad u Magistrate bad u DSP na Assam la mynjur ban pynsangeh shwa ia katei ka jingpom dieng haduh ba kan don ka jingiapynbeit na ki DC jong baroh arliang ki district.

U Magistrate na West Karbi Anglong District u ai nia katei ka jaka ka dei hapdeng ka jingiakajia hapdeng ka Assam bad ka Meghalaya bad kumta na ka liang jong ka Meghalaya ka dei ban ai jingtip ia ka Assam shwa ban leh ia kano kano ka kam ha kitei jaka jingiakajia.

Na ka liang jong ki nongpyniaid shnong bad ki nongshnong shnong jong ka Khanduli ki pynpaw ia ka jingsngew diaw ka jong ki halor ka jingshah pynsangeh noh ia katei ka jingpom dieng da ka Assam watla ka jaka ka dang dei pura ha ka jingkhmih jong ka Dorbar Shnong Khanduli ne Meghalaya.