Shah pynduh u Ayush ia ka bhah pule MBBS ba ieng tyngeh ka JSU bad ki nongialam shnong Thangskai

Syllad | The Rising MeghalayaOctober 2, 2023

Ha kaba khatduh u Ayush Kumar u la shah pynduh duh ha kaba iadei bad ka bhah pule MBBS namar ka jingieng pyrshah jong ka seng Jaintia Students’ Union (JSU) bad ki nongialam jong ka shnong Thangskai, East Jaintia Hills District.

Lah ban kdew ba ka JSU hadien ba la lap ba u Ayush Kumar u la pyndonkam da ka PRC kaba shu ioh thok na DC East Jaintia Hills ha u snem 2021 da ka ba aplai lyngba ka Temporary Residential Certificate na ka shnong Thangskai u lah ioh ia ka PRC, bad  ha u juh u snem u la aplai da ka state quota MBBS 2023-24 bad ia kane ruh u lah ioh.

Hynrei na liang ka JSU ka la iai buddien halor kane ka jingleh shukor jong u Ayush ha kaba ka la dawa mardor na ka sorkar ba ka dei ban pyndam ia u na state quota ban pule MBBS ha ryngkat ka jingiasnohkti lang ki nongialam shnong Thangskai.

Na ka liang ki nongialam ka JSU dang shen ki la iakynduh bad ai ruh da ka jingthoh sha ka Myntri ka tnat ka koit ka khiah ka Kong Ampareen Lyngdoh bad kumjuh sha u Bah Cyril V Diengdoh IAS uba dei peit ia Home and Political Department ka sorkar jylla ha kaba iadei bad kane ka phang.

Nalor kata ka JSU ka la buh ruh da ka shithi ujor sha u DC ban pynshisha ba u Ayush Kumar um dei hok ban ioh ia ka state quota ban pule MBBS namar u dei u bar jylla bad ba u kpa jong u don Aadhaar sha Bihar bad ka EPIC ruh ki don sha Bihar bad u kpa jong u, u dei uba shu sah trei ha Dalmia Cement bad ba um don hok ban ioh PRC namar um dei u ba shong sah hapoh ka jylla.

Kumta ruh na ka liang ka JSU ka pynpaw ka jingsngewnguh ia shnong Thangskai kaba lah pdiang ia ka jingbakla da kaba buh da ka shithi ujor pyrshah ia u Ayush bad ia u kpa jong u sha u DC ka East Jaintia bad kane ka jingdawa ka seng ka log kaba jop.

Ha kajuh ka por ka JSU ka phah ruh ia ka khubor sha baroh ki nongialam shnong ka Bri u Hynniewtrep ba kim dei satia ban ai klumar ia ki syrnot shnong lane NOC ia ki bar jylla nangne shakhmat namar ka lah ban ktah jur ha kiba bun ki liang bad ka long ruh kum ka jingiuhroit ia ka hok jong ki trai ri trai muluk.