Shah pynïap 1, mynsaw jur 2 ba shah kynnoh Menshohnoh

Syllad | The Rising MeghalayaMarch 9, 2020

Uwei u samla ula shah pynïap, katba arngut kila mynsaw jur hadein ba kila shah bom shah shoh ha ki paidbhur jong ka shnong Syntung tang namar ba suba bad kynnoh Menshohnoh.

Ka tyllong khubor kaba ïoh lum na ki Pulit, ka kynhun jong ki Khyndai ngut ki samla na Madanrting kila leit sha Syntung ban leit bam khana haka Sngi U Blei.

Namar ka jingsuba sniew bad kynnoh menshohnoh kine ki paidbhur kila thombor bad bom shoh ïa kine ki samla bad uwei ula khlad naka jingmynsaw.

Une uba la khlad la tip kum u Macmillan Kharshandy khun ka R. Kharshandy na Madanrting, Lumbasuk bad arngut ki paralok jong kila mynsaw jur na khlieh kiba la tip kum u Ricky Dkhar(26) khun jong ka D. Dkhar na Lumjingsuk, Madanrting bad Teiborlang Kharbyngar (25) khun jong u (L) Kordor Nongkynrih na Madanrting.

Ka khynhun pulit kala hiar sha katei ka shnong ban leit pyllait ïaki 3 ngut kiba phet rieh sha khlaw naka jingtieng bad 5 ngut pat kila lait phet na ka tyrsim jong ki paidbhur.