Shah pyniap dusmon u nongniah trok na Jowai ha Assam, lap ia ka metiap ba buhrieh

Syllad | The Rising MeghalayaMarch 24, 2024

Uwei u nongniah trok na sor Jowai, West Jaintia Hills ia uba la tip kyrteng kum u Nicholas Dkhar u la shah pyniap dusmon bad ka trok kit dewbilat kaba u niah ka la shah rahbor noh ha uwei u runar ha ki bynta ka Nagaon distict ka Assam ha ka 22 tarik mynta u bnai.

Ki bor pulit hadien ba la ioh jingtip na u trai jong ka trok ki la lapdien noh ia kane ka kali napoh Pub-Deopani hajan Kaziranga National Park, Assam bad kem noh ia u briew uba donkti.

U runar uba donkti ha kane ka kam bymman u kyrteng u Raju Nathuh uba dei na Pandu, Guwahati uba la leh ia kane ka kam pyntriem da kaba pyndonkam da u wheel wrench uba don hapoh ka trok shwa ba un rahbor noh ia ka kali.

“U Raju u don ia ka jingthmu ban rah ia kane ka trok sha Jorhat na ka bynta ban die beain ia ka mar sha katei ka jaka,” ong u heh pulit. Kane ka trok kaba don ia u registration number NL01-AA6213 ka dei kaba kit dewbilat na Meghalaya bad da ka jingthmu ban leit pynhap sha Suraksha Cement (KD Cement) hapoh Samuguri in Nagaon district ha ka step jong ka 22 tarik mynta u bnai.

“Hynrei u trai jong ka trok u Gurdeep Singh u la lapdien ia kane ka trok lyngba u GPS bad iohi ba ka la jam palat ia ka jaka kaba dei ban leit ha kaba u la pyntip noh mardor sha ngi. Ngi la pynlong ka jingbehthong bad lapdien ia kane ka trok ha Deopani shwa ban poi ha Bagori,” ong u heh pulit.

U heh pulit u la ong ba ia kane ka trok la rah noh shapoh police station bad la kem noh ia u Raju hadien ba u trai jong ka trok u la pynthikna ba um dei satia u nongniah jong u. Ha ka jingtalasi ki pulit ki la lapdien ia ka metiap napoh ka jaka ba la shna kyrpang jong ka trok. Hadien la pynkynriah noh ia ka metiap na ka bynta ban leh ia ka post mortem.

“U Raju Nath u dei u runar uba la paw bha. Kham hashwa u la shah kem la bun bun sien halor ka jingdonkti ha ki kam rahbor ia ki trok. Hynrei, ka long kaba sngewlyngngoh kumno ba u la iohlad ban rung hapoh katei ka trok. U la iathuh ha ngi ba u don u briew uba la phah synran lem ia u nongniah jong ka trok na Shillong bad ba u la synran lang ia u naduh Shillong,” ong u heh pulit.

“Mynta ngi dang pynlong ka jingthwet ia utei u briew uba la phah synran ia u Raju bad katei ka trok. Hynrei haduh mynta hi ym pat shym la lapdien ia u bad ka mobile phone jong u ruh ka la switch off naduh katei ka sngi ba la jia katei ka jingjia,” ong shuh shuh u heh pulit.