Shah pyniap dusmon u rangbah ha ka shnong Erpokon, Ri Bhoi District

Syllad | The Rising MeghalayaMay 12, 2024

Uwei u rangbah 38 snem rta uba kyrteng u Kyrmen Lyngdoh Nonglait la suba jur ba u la shah pyniap dusmon ha ki runar ki bym lah ban ithuh ha ka miet sngi Saitjain 11 tarik Jymmang hapoh ka Shnong Erpokon, Ri Bhoi District.

Na ka liang ki pulit ki la ong ba kane ka jingjia ka la jia ha ka por kumba 8 baje mynmiet ha kaba ia ka met jong u la lap hi ha katei ka miet da ki nongshong shnong kiba la pyrshang ban pyllait im ia u da kaba pynkit noh mardor shapoh Civil Hospital, Nongpoh hynrei ia kaba la pynbna ba u la dep khlad lypa namar ka jingmynsaw.

Kumba la paw la sakhi ba ym shym la don satia kino kino ki dak mynsaw ha ki met ki phad jong u lait noh ka jingmih snam ha ki shkor, kata kaba pyni ia ki rukom thombor ba la pyndonkam da ki runar.

Ha kaba iadei bad kane ka jingjia na ka liang ki bor pyniaid shnong jong ka Erpokon ha ryngkat kiba haiing hasem jong une u lanot ki la ai ka jingiatreilang bad ki bor pulit ha kaba iadei bad kane ka jingjia.

Ki bor pulit ka Ri Bhoi ki la shimkhia halor kane ka jingjia bad pynlong ruh ka jingleit jurip bniah sha katei ka jaka ba la jia ha ka sngi U Blei kaba bud bad sdang ruh ban pynlong ia ka jingtohkit halor kane ka jingjia.

Ia ka met jong utei u rangbah la pynkynriah noh shapoh NEIGHRIMS, Shillong na ka bynta ban pyndep ia ka post mortem.

Na ka liang ki nongshong shnong ka Erpokon ki la kyntu jur ia ki bor jong ka ain ba kin thwet jur ia ki runar kiba donkti ha kane ka kam pyntriem khnang ba kin ngat ha ka jingshah pynsaja katkum ka ain.