Shah pyniap dusmon u rangbah ha Umtasor Mawdkhar, Ri Bhoi

Syllad | The Rising MeghalayaMay 25, 2024

Ha kawei ka jingjia shah pyniap  kaba la pynher syrngiew ia ki nongshong shnong, u wei u rangbah briew u la iap hashen hadien ba u la shah pom da ki kynja tiar ba nep na ki bynta ba nadien jong u ryndang ha ka jingjia kaba la jia ha ka miet 23 tarik Jymmang ha ka shnong Umtasor Mawdkhar, Ri Bhoi District.

Katkum ki jingtip ba la ioh kane ka jingjia ba sngewtriem ka la jia katba utei u rangbah uba kyrteng u Amison Muruh 35 snem rta u dang don marwei ha la ka jong ka iing, hynrei la suba jur ba ki runar kila wan rung jubor bad  pom da kaba kynja tiar ba nep na ki bynta ba shadien u ryndang haduh ban da khlad syndon hashen.

Na ka liang u Rangbah Shnong u Bah R Mukhim u la iathuh ba kane ka jingjia kaba sngewsih kaba la wan tap hapoh ka shnong ka thaw ka long shisha kaba ym lah ban pdiang ha ka imlang ka sahlang bad kaba la pynshong syier ia ki paidbah nongshong shnong khamtam ki khunlung khynnah.

U la iathuh ruh ba u la ioh jingtip halor kane ka jingjia kaba sngewtriem ha ka por 7 shiteng eiei janmiet, ha kaba ma u lem bad ki nongialam shnong ki la leit bran bran sha katei ka iing bad lap ba u tei u rangbah ba la thiah lyngktar hapdeng ka jinglynkien jong ka snam hapoh ka iingsah jong u. Hadien kane marmar na ka liang ka shnong ka la pyntip sha ki bor pulit ka Nongpoh Police Station kiba la poi ha kane ka shnong ban pynlong ia ka jingtohkit.

Nalor kata u Rangbah Shnong bad u Kni jong u Bah Amison Muruh u bah Seibor Muruh, ki la pynrem jur halor kane ka jingjia shah pyniap jong une u nongshong shnong bad na ka liang kiba haiing hasem bad ki la kyrpad jur ia ki bor ka ain ban kem mardor ia ki runar kiba donkti ha kane ka kam pyntriem.

Halor kane ka jingjia na ka liang ki bor pulit ki la rah ruh ia ki katto katne ngut ki briew ba la suba donkti ha kane ka kam pyniap na ka bynta ban pynlong ia ka jingtohkit.