Shah pyniap u nongniah trok ba na Mynsngat ha Mukhla
Uwei u nongniah trok u la shah pyniap dusmon ha ki riew runar ki bym lah ban ithuh ha ka miet 7 tarik mynta u bnai hajan ka surok bah National Highway-6 kaba don marpyrshah ka petrol pump Mukhla Umsuwe, West Jaintia Hills District
Ka khubor pulit ka iathuh ba hadien ba ki la ioh jingtip na u Rangbah Shnong ka Mukhla halor ka jingiania hapdeng ki briew ki bym lah ban ithuh ha Mukhla Umsuwe, kumta na ka liang u Sub-Inspector J. Chyne bad u Bah R. Dkhar lem bad ka kynhun ki la her mardor sha katei ka jaka.
![](https://www.syllad.com/wp-content/uploads/2024/09/JIT-Vacancy-823x1024.avif)
Ha ka jingtohkit hapoh ka shnong Ladmukhla, ki pulit ki la shem ba katei ka jingjia shah pyniap ka la jia ha ki bynta ba long khlaw marpyrshah ka Pnar service station.
Haba pynlong ia ka jingwad ha kane ka jaka khlaw kaba rit ki la lapdien ia kawei ka metiap hapdeng ka jinglyngkien jong ka snam ia kaba la suba jur ba u la shah pyniap ha ki runar ki bym lah ban ithuh.
Hadien kane la pynkynriah noh ia ka metiap shapoh Jowai Civil Hospital, Ialong ban leh ia kaba donkam.
Lyngba ka laisen niah kali ba la lap na ka met jong u la ithuh ia une u briew kum u Bah Sambun Dkhar uba dei na ka shnong Mynsngat bad uba dei ruh u draibar trok uba niah ia ka trok kaba don ia u BR No. NL01 AC 6175.
Hadien la lap ruh ia u nombor phone jong u trai kali na kane ka trok uba la pynthikna ruh ba u Sambun u dei u draibar jong u. Lyngba ka dur na ka WhatsApp la pynthikna shuh shuh ia une u lanot.
Lah ban kdew ba u Sambun Dkhar u dei uba la shah kynnoh donkti ha kaba rahbor bad pyniap ia u (L) Pynkhreh Surong uba dei hi na ka shnong Mynsngat, uba ia ka metiap jong u la lapdien na ka jaka khlaw hajan ka surok bah NH-6 na Pommura ha u bnai Lber 2022.
Na ka liang ki bor pulit ki la bteng ban pynlong ia ka jingtohkit ban lapdien la kane ka jingjia ia u Sambun ka don jingiadei ne em bad kane ka kam pyniap.
Leave a Reply