Na ka jingiakhajia ki shi kmie shi khun shah pyniap u wei, bthah jubor uwei iala ka jingim ha West Jaintia Hills

Syllad | The Rising MeghalayaJune 22, 2021

Ar ngut ki briew kila duh ei iala ka mynsiem hadien ka jingiakhajia kaba mih hapdeng ki shi kmie shi khun ha kawei ka shnong kaba hap ha thanad Raliang Police Out Post, West Jaintia Hills District.

Katkum ka tyllong khubor kaba iohlum ba kane ka jingjia kala jia haka sngi Robibar haka shnong Mynska ha kawei ka jaka rep kaba jngai naka shnong.

La iathuh ba uwei u briew uba kyrteng u Samli Suchiang (40 snem ka rta) ula shoh bad bom dusmon iaka kmie kaba la tip kyrteng kum ka Phol Suchiang, hynrei u para shnong bad uba rep hajan kane ka jaka rep uba iohi ia kane ka jingjia ula leit iarap.

Pynban ula shah dung iap ha u Samli Suchiang, iathuh ka tyllong khubor. Une ba shah pyniap u dei uba la tip kyrteng kum u Robi Dhar (56 snem ka rta).

Ki ba haiing ka kong Phol hadien ba kila ioh jingtip ia ka jingjia mar mar kila leit ban ai jingiarap ban pynkit iaka sha hospital bad ka don hapdeng ka jingshitom kaba jur.

Ki nongialam shnong hadien ba kila ioh jingtip ia kane ka jingjia haka step sngi Nyngkong kila pyntip sha ki Pulit.

Ki Pulit mar mar kila shimkhia ban hiar sha katei ka shnong bad haba leit ha iing u Samli kila lap ba la khang iaka jingkhang ka iing. Ki Pulit kila kyndang iaka jingkhang jong ka iing bad kila lap pynban iaka met jong u Samli kaba sdien ha u tyllai phasi.

Ki Pulit kila shimti ia baroh artylli kine ki metiap bad kila pyndep iaka jingdonkam jong ka aiñ.

U Superintendent of Police, West Jaintia Hills Bikram D Marak ula ong ba kila register iaka case bad ka jingtohkit kala iaid shakhmat. Ula ong ruh ba kam don kano kano jingsuba sniew ia kiwei halor kane ka jingjia.

Ula ong ruh ba katei longkmie ka shitom jur bad mynta ka don haka jingshah sumar ha Woodland WK Hospital, Sabahmuswang.