Shah pynjulor ka jaka tep briew Khasi ha Mawlaingut, pynrem ka Seng Khasi Kmie

Syllad | The Rising MeghalayaNovember 5, 2020

Ka Seng Khasi Mawlaingut, ka la leit ba kan ujor da ka ejahar ha Lumdiengjri PS haba iadei bad ka jingshah pynjulor ka jaka tep briew Khasi haka 3 tarik une u bnai.

Ha kane ka ejahar, na ka liang ki nongialam ka Seng Khasi Mawlaingut, kila kyntu iaki pulit ban shim khia ban kem ia ki briew ba donkti ban pynjulor ia kane ka jaka tep briew Khasi bad ban pynshitom katkum ki kyndon jong ka aiñ.

Kane ka jingjia kala jia hapoh ka shnong Mawlaingut haka 20 tarik jong u bnai Risaw ba la dep.

Katkum ka jingujor la lap iaki dak pynjulor ia kane jaka ba kyntang dei ka jingmait bad dain dusmon ia ki dieng kiba la mih ha kane ka jaka.  La iathuh ba kane ka jaka ka dei jong kong Prem Nongbsap bad ba I la die noh sha ka Seng Khasi Mawlaingut ha ka 20 tarik u bnai Nohprah 2017.

Halor kane ka jingjia, ki nongialam ka Seng Khasi Mawlaingut kila pynrem jur ia ki briew kiba la leit ban pynjulor ia kane ka jaka ba kyntang bad pynpaw ka jingpyrshah kaba jur.

Ka Seng Khasi Mawlaingut kala kyrpad bad kyntu ia ki bor ka ain ba kin kem mardor ia ki briew ba la donkti ha kaban leit ban thombor ne ban pynjulor ia kane ka jaka.

Ki nongialam ka Seng Khasi Diengiei Nongthliew Area, ki la pynlong ia ka jingleit ban jurip da la ki jong ki khmat sha kane ka jaka ba la  shah pynjulor, ha kaba ki la lap bad shem  da la ki jong ki khmat ia kitta ki matti jong ka jingshah pynjulor jong kane ka jaka da ki riew shim kabu.

Ka Seng Khasi Kmie, Shillong, kam lah ban khlem da pynrem jur ia ki briew ba la don kti ha kaban leit ban pynjulor ia u lum jingtep ba dei jong ka Seng Khasi Mawlaingut.

Ka Seng Khasi Kmie ka kyntu ia ki bor ba dei khmih jong ka distrik, ban shim khia ha kaban kem mardor ia ki briew ba donkti, ha kaban leit ban pynjulor ia kane ka jaka.