Shah pynngat kylla ka kynthei ba kam shah leh beijot ha ki sawngut ha ka POCSO Act

Syllad | The Rising MeghalayaMay 1, 2024

Ka kynthei kaba la kam ba ka la shah leh beijot kynhun ne gang rape ha ki sawngut ki shynrang kaba la jia dang shen ha ka nongbah Shillong ka la shah rejistar case kylla hapoh ki kyndon jong ka POCSO Act.

Kane ka la wan long ruh hadien ba uwei uba dang khynnah rta napdeng kitei kiba la shah kynnoh donkti ha katei ka kam leh beijot u la ujor kylla da ka ejahar hapoh Rynjah police station ha 29 tarik mynta u bnai pyrshah ia katei ka lanot halor ka jingkynnoh ba ka la leh ia ki kam khlem akor pyrshah ia u ha katei hi ka sngi ha kaba ka la ujor pyrshah ia ki, ong u Superintendent of Police (SP) ka East Khasi Hills, u Rituraj Ravi haka 30 tarik Iaiong.

Na ka liang u SP ui la ong ruh ba ia kane ka ejahar la register hapoh ki kyndon jong ka  POCSO Act lem bad ka IPC bad ka jingtohkit mynta kala iaid shakhmat.

Lah ban kdew ba kham hashwa ki pulit ki la kem noh ia sawngut ki shynrang kaba kynthup ia uwei uba dang hapoh ka rta halor ka jingkynnoh donkti ha ka kam leh beijot kynhun hadien ba la ujor ejahar da katei ka lanot.

Kane ka la wan long ruh hadien ba ka video kaba iadei bad ka jingpyni ia katei ka jingjia shah leh beijot kaba la jia ha u bnai Nailur 2023 ka la saphriang dang shen lyngba ka online.

Ha kane ka jingujor FIR ka jong u, une u khynnah u la kam ba u dang don 17 snem rta bad ba u dang pule hapoh skul ha ka por ba katei ka jingjia ka la jia ha une u snem ba la dep hapoh ka iingsah wai ka jong ki bad ba ma u lem bad kine ki paralok ki ithuh bha ruh ia kane ka briew kaba la pynpaw ba ka kwah ban shna youtube video  ia ka gaming jong ka kumjuh ia ki jingrwai bad kiwei pat.

Nalor kata u la kam ruh ba ka ong ba un iasam ne share ia ki video jong ka bad ki paralok skul ki jong u bad ba ka la wan jngoh ruh sha ka iingsah jong ki lah kumba katto katne sien, hynrei u la pynpaw ba um pat shym la sam satia ia kino kino ki video ki jong ka sha la ki jong ki paralok.