Shah pynpra ka ïingmane ki riew ngeit ka balang Pentecost ha Tongseng, khlem ioh NOC ong ka bor shnong

Syllad | The Rising MeghalayaOctober 2, 2021

Ka ïiing mane ki riew ngeit ka balang Pentecost haka shnong Tongseng, Elaka Nongkhlieh, East Jaintia Hills kala shah pynpra ha ki nongshong shnong ka shnong Tongseng hadien ba ka shnong kam shym la ioh NOC ban tei ia ka ïing mane.

Kane ka jingshah pynpra kane ka ïing mane kaba dang sdang shna artad kala jia haka sngi Saitjain.

La kynnoh ba ki nongshong shnong ka Tongseng kila mih paidbah bad pom dusmon iaki dieng ki siej bad ki jingthung jingtep bad pynpra ruh iaka ïing kaba dang sdang ban shna ha katei ka shnong.

Ka Kong Holini Bareh kala iathuh ba ia kane ka iingmane la sdang shna ha u bnai September (Nailur) 2021 bad la ai jingtip sha ka shnong da ka jingthoh bad kila ioh iaka jubab mynta ka sngi hadien ba la wan ban pynjulor ia katei ka iing bad ki jingthung jingtep ha katei ka jaka.

Haba iakren bad u waheh shnong Tongseng, u ma West Rupon ula ong kam don kano kano ka jingiadei ne pyrshah iaka niam ka rukom, hynrei namar ba kine ki riewngeit kim shym la ioh ka NOC ne ka jingbit na ka shnong ban tei iaka iing mane, ka shnong kala rai ban leit pynpra.

U Ma Rupon, ula ong “lada tei kano kano ka iing kynthup iaka iing sher dara ne ka trep masi katkum ka rukom pyniaid shnong hi dei ban ioh ka NOC na ka shnong bad kine ki riew ngeit na ka Balang Pentecost kim shym la ioh ka NOC ban tei iingmane na ka shnong bad da kawei ka sur ka bor shnong kala rai ban pynpra ia kane ka iing mane ha katei ka jaka kaba don hapoh u pud u ang ka shnong.”