Shah rahbor, thombor bad shah pynap suloi u samla ha ki 3 ngut kynthup u pulit bad kontraktor ha Mukroh

Syllad | The Rising MeghalayaMarch 24, 2025

Uwei u samla na ka shnong Mukroh, West Jaintia Hills District ula kynnoh ba ula shah rahbor sha khlaw bad shah pynap suloi bad shah shoh shah dat ha ki 3 ngut ki briew katba u dang don ha lynti ban leit sha lyngkha.

Une u samla uba la ngat ha kane ka apot u dei uba la tip kyrteng kum u Aibandari Sumer 22 snem rta bad kane ka jingjia kala jia ha ka 22 tarik Lber ha ka por kumba 10 baje mynstep.

Katkum ka ejahar ba la ujor ha u Officer In-Incharge Barato Outpost, la ong ba u Aibandari Sumer ryngkat bad u paralok u, u Riham Sumer ki dang mut ban leit trei sha lyngkha kaba don ha Sanaro, Mukroh, hynrei katba ki dang don ha ka lynti ha Sanaro, Mukroh la wan poi 3 ngut ki briew uwei uba kam ialade kum u kontraktor uba pyntrei ia ka jingpynkhyllem ia ki dieng ha Salang, Mukroh, uwei u pulit Assam bad uwei pat uba wanlang bad ki ha kaba ki la rah jubor ia u katba u paralok jong u, ula lait phet.

Katkum ka ejahar la iathuh ruh ba kitei ki 3 ngut ki briew kila rah jubor ia u shapoh khlaw bad ki la khum iaki kti jong u shadien da ka jain sopti (Shirt) ba u phong bad kila pynap ruh ia u da ka suloi ia bad maham wat ban pyniap ia u hadien ba ki la bom la shoh ia u haduh ba um tip briew shuh.

Hadien ba kila dep leh ia kane ka kam bad hadien katto katne por u Aibandari ula kham iohbor bad kyndit bynriew bad kita ki 3 ngut ki briew ruh kim don shuh ha kata ka jaka bad ula wanphai noh sha la iing, la ong ka ehjahar.

Halor kane ka jingjia u Aibandari Sumer ula kyrpad ia ki bor jong ka ain ban shimkhia bad ban pynshitom ia kine ki 3 ngut ki briew kiba donkti ban thombor ia u.

Haba ioh ban iakren bad u Secretary Shnong Ma Precious Sten halor kane ka jingjia ula pynpaw ka jingsngewdiaw namar ba ka Dorbar Shnong Mukroh na ka por sha ka por ka ju pynsngew shaki bor pyniaid District jong ka West Jaintia Hills kumjuh sha u CEM jong ka JHADC bad wat sha ki bor sorkar halor ki jingeh bad jingshah pyndik jong ki nongshong shnong ka Mukroh hynrei ula ong ba na ka liang ka sorkar ka la shu sngap mynthi.

Ula ong ba ka dorbar shnong ka la dawa ruh ban buh noh ia ka BOP ha Mootha Siangkwai khnang ban lait na kum kine ki jingjia.

Lah ban kdew ba shisngi shwa kane ka jingjia u Deputy Commissioner ka District u AK Singh u la pynlong ka jingleit jurip da lade ha ka 21 tarik u Lber sha ki thain khappud jong ka Shnong Mukroh haba ka KAAC ka la shna beain ia ki surok bad ia ka kper slasha.’