Shah rai set phatok junom ki 3 ngut halor ka kam pyniap briew ha Lumkhudung

Syllad | The Rising MeghalayaAugust 8, 2023

Ka iingbishar jong u Session Judge ka West Jaintia Hills District, Jowai ha ka 4 tarik mynta u bnai ka la rai pynrem ia ki laingut ki briew kiba donkti halor ka jingshah pyniap jong u Sada Muruh da kaba set phatok shi junom.

Kane ka rai pynrem ka la wan long hadien ba la lap ia ki sakhi satar ia ka jingdonkti jong kine ki laingut ki briew ia kiba la tip kyrteng kum u Tngen Muruh, She Muruh bad u Tne Muruh kiba dei na ka shnong Lumkhudung, West Jaintia Hills District kiba donkti ha kane ka kam pyniap.

U Superintendent of Police, West Jaintia Hills, Jowai ula ong ba ha ka 16.11.1991 la ujor FIR ha u In-charge ka Ummulong Beat House, Jowai da u Kaia Muruh uba dei shipara bad utei u lanot ba la shah pyniap u Sada Murah pyrshah ia ki san ngut ki briew kiba donkti ha kane ka kam pyniap kaba la jia ha ka 16.11.1991 ha ka shnong Lumkhudung, kata pyrshah ia u Tngen Muruh, Lowit Muruh, She Muruh, Tne Muruh bad u Kamai Muruh kiba dei na ka shnong Lumkhudung.

Hadien ia ka case la rejistar hapoh Jowai Police Station na ka bynta ban pynlong ia ka jingtohkit. Haka jingtohkit na ka liang u SI Q.E. Pala u la pyngngat ia baroh kine ki san ngut kiba la shah pynmih kyrteng haka kyndon kam pyniap briew.

Hynrei u I/O Q.E. Pala u la khlad noh ha ka 11.06.2022. Kumjuh ki arngut kiba la shah kynnoh donkti, kata u Kamai Muruh bad u Lowit Muruh ruh ki la  khlad noh ha ka por ba ka jingtian bishar ka dang iaid shakhmat. Kumta ka jingtian bishar ka la bteng pyrshah ia ki laingut kiwei pat, kata pyrshah ia u Tngen Muruh, She Muruh bad u Tne Muruh.

Kumta ruh hadien ba la lap ia ki sakhi satar kiba biang pyrshah ia kine kiba la shah kynnoh donkti la rai pynrem ia ki da kaba set phatok shijunom.