Shah rai set phatok junom ki 3 ngut halor ka kam pyniap briew ha Thadsning, West Jaintia Hills

Syllad | The Rising MeghalayaSeptember 4, 2023

Ha ka 30 tarik u Nailar ba la dep ka kashari  u Sessions Judge, West Jaintia Hills, District Jowai katkum ka Sessions Case No.105 of 2013 lyngba ki sakhi satar kiba biang ka la rai pynrem da kaba set phatok junom pyrshah ia ki laingut ki briew kiba donkti ha ka kam pyniap briew kaba la jia naduh ka 01.06.2006 hapoh ka shnong Thadsning, WJHD.

U Superintendent of Police, ka West Jaintia Hills District, Jowai u pyntip ba ha ka 02.06.2006 la ujor FIR hakhmat u Officer In-charge Jowai Police Station da uwei u briew uba kyrteng u Barley Chullet uba dei u hymmen jong u lanot ba la shah pyniap u Lobi Chullet, kata da kaba kynnoh ba laingut ki briew kiba la tip kyrteng kum u  Shem Langstang, u Tharki Langstang bad u Hiarki Langstang ki la pyniap ia u Lobi Chullet ha ka 01.06.2006 ha ka jaka ba la tip kum ka Ait Shrieh kaba don ha ka shnong Thadsning.

Hadien la rejistar case hapoh Jowai Police Station katkum ka Jowai PS Case No. 65(6)06 U/s 302/201/ 34 IPC.Ia kane ka case la shimti da u SI C Lamare na ka bynta ban pynlong ia ka jingtohkit, bad hadien ka jingtohkit na ka liang u IO uba khmih ia kane ka case u la pynngat pyrshah ia kitei ki laingut ki briew hapoh ki kyndon U/s 302/201/34 IPC.

Kumta ruh haka 30.08.2023, katei ka kashari u Sessions Judge, West Jaintia Hills, District Jowai ka la rai pynrem ia kitei ki laingut kiba donkti ha katei ka kam pyniap briew hapoh ki kyndon U/s 302 IPC da kaba set phatok shijunom.