Shah rem noh ka Mynken CHSS ha ka final jong ka Subroto

Syllad | The Rising MeghalayaSeptember 11, 2024

Wat hapdeng ka jingkyrmen jong kiba bun ki paidbah nongkyrshan, hynrei ka Mynken Christian Higher Secondary School ka la shah pynliem noh ha ka TG English School, Manipur ha ka tie breaker da 4-3 kol ha ka final jong ka lympung U-17 ka “63rd Subroto Cup International Football,”  kaba la long haka i 11 tarik Nailur ha Dr Ambedkar Stadium, New Delhi.

Kane ka jingshah rem ka la wan long ruh wat hadien ba ka Mynken ka la lah ba kan jop lut ia baroh ki jingiakhun ha ryngkat bad ka jinglah ban thep haduh 39 tylli ki kol ha kane ka lympung ialehkai.

Kane ka jingshah rem noh ka la wan long ruh hadien ba ka Mynken kam shym la lah ban thep ia kawei na ka penalty kaba ka la ioh, kata watla kawei pat ka penalty ka la lah ban lam sha ka jingiakhaid haduh kaba kut jong ka kynta jong ka jingiakhun hashwa ban leit sha ka tie breaker.

Ka skul na Manipur ka la ioh ban thep nyngkong ia ka shi kol hashwa ban kut ka kylla step lyngba ka corner hadien ba ki rangialehkai dien kim shym la lah ban tehlakam ia ka bol kaba la pynlong ia ka Manipur ba kan ioh thep da kaba suk.

Katba ha ka kylla miet ka Mynken ka la pyrshang borbah ban pynphai ia katei ka shi kol hadien ba ka la ioh da ka penalty kaba la shut da u Alicestar Thangkhiew hynrei kaba la leit dei ia u dieng kol.

Na ka liang ki player ka Mynken ki la sdang ban banbor pyrshah ia ka Manipur hadien ba ka la ioh biang sa kawei ka penalty lyngba ka handball hapoh ka jaka jong u kol kaba la pynlong ia u Banpliebok ba un ioh ban pynkhih ia ka jar. Hynrei ka jingialehkai ka la poi noh sha kaba kut ha ka jingiakhaid.

Ha ka tie breaker ruh la sakhi ia ka jingiakhaid mar lai kol, hynrei ha kaba khatduh u player ka Mynken um shym la lah ban pynrung ia ka kol kaba la pynlong ia ka Manipura ba kan rah syndon ia ka thong jong ka jingjop.

Ha kane ka sngi la sam ruh ia ki khusnam ba kyrpang ha kaba ka nam best Coach la ioh da u bah Kitborlang Kharlukhi, katba ia ka nam best player la ioh rah da u Banpliebok Khongjoh.