Shah shet ki longkmie bad shah tap haka pum pum rnga dewiong ha Nongrim Hill

Syllad | The Rising MeghalayaFebruary 17, 2021

Ki longkmie jong ka shnong Nongrim Hill ka shnong kaba don hajan ka Umtyra, East Jaintia Hills District kila shah shet ha ki nongpyniaid kawei ka kharkhna saiñ rnga dewiong (coke factory) kaba la kular pynbiang nadong shadong ban ialeh ban pynkhuid iaka haw haw bad sawdong sawkun ka mariang haka kharkhana ha ka shnong jong ki, phewse ka shnong jong ki kala shah tap haka pum kaba suba jur ba mih na kane ka kharkhana bad kala wanrah ruh ka jingjulor ki tyllong umbam umdih.

Hajan kane ka shnong ki don artylli ki kharkhana saiñ rnga dewiong, hynrei kine ki kharkhana kim shym la bud iaki kyndon iada aiñ mariang kumjuh ban bud iaki lad jingiada iaka koit ka khiah u briew, la kynnoh ki longkmie ka shnong Nongrim Hill.

Ki longkmie kane ka shnong naduh ba sdang ban shna ia kane ka kharkhana naduh u snem 2019 kila pynpaw ka jingyrshah kaba jur, hadien ba ki nongialam shnong kila ai jingbit ban tei iaka, hynrei ki bor pyniaid kila kular ban pynbiang iaki jongdonkam bad bud iaki kyndon shna kharkhana.

Kine ki longkmie kila iathuh ba ïaka NOC la ai ha u 2019 tang kawei ka karkhana na bynta ban pynïeng ïaka karkhana ka ban long kham pajih na shnong, hynrei ynda haba u trai ula ïoh ïaka NOC la shna pynban hajan ka shnong bad mynta u snem 2021 u trai ula pynïeng biang sa ïa kawei pat ka karkhana ha kajuh ka jaka kaba ki nongshong shnong kim tip ei ei.

“Naduh ba sdang ka jingpan NOC ngi ki longkmie ngi pyrshah jur namar ngi tip ba kan ktah ïaka koit ka khiah jong ki nongshong shnong kumjuh ki para marjan, hynrei ki nongïalam Shnong khlem jingmynjur lang ki dep ban ai ka NOC ïa u trai karkhana bad ma ngi ruh la shuh hun la ka hun,” la ïathuh ka kong Tiplem Lapasam.

Ha ka jingidei bad kane ka jingeh na ka liang ki nongshong shnong kila leit ban pan jingiarap na ki dkhot ka East Jaintia National Council (EJNC), ha kaba na ka liang ka EJNC haka jinglamkhmat u Sambormi Lyngdoh president bad kiwei kiwei ki dkhot haka sngi Balang, kila hiar jurip ia kane ka shnong bad la lap ba ki briew jong kane ka shnong ki don ha ka jingma kaba khraw na ka jingshah ktah u pum pum jong ki kharkhna.

Ki ar ngut ki longkmei kane ka shnong ka kong Rida Bareh bad ka kong Tiplem Lapasam, ki la ong bad katkum ka jingtip jong ki, ka shnong ka ai tang kawei ka NOC sha u trai katei ka kharkhana u ma T. Nongtdu naka bynta kawei ka kharkhana bad ruh ban shna sha ka jaka ba kham pajih na ka shnong, hynrei la tei pynban hajan shnong bad mynta la pynkhreh ban tei sa kawei kharkhana sain rnga dewiong ha kane ka jaka.

Ka EJNC kala ong ba kan leit ai da ka jingthoh sha u Deputy Commissioner, East Jaintia Hills District bad un pynsangeh shwa ban pyntrei kam ia kitei ki kharkhana bad lada ka ophis u DC kam lah ban leh ei ei na ka liang ka seng kan iad da kawei pat ka lynti. La kyntu ia ka JHADC kam dei ban ai NOC shuh iaki kharkhana ba pyndonkam da u dewiong.